اسلام آباد(پاکستان نیوزپوائنٹ23اگست2017ء) ہنداسال گوادر اٹی جوڑ جاڑ و شونداری ناسال جوڑ مننگ والا ءِ ، سی پیک نا رداٹ ہنداسال بجلی و انفراسٹرکچر نا چندی ڈٹ آتتون اوار اوار غٹ آن اہم گوادر جہانی بالی پٹ آ جوڑ جاڑی کاریم تا بناء مریک ، ڈٹ ارٹ آن مسہ سال اٹی سنگت ملک چین نا کمک اٹ پورو کننگک ۔ پلاننگ کمیشن نا کمامدارآتارداٹ گوادر انٹر نیشنل بالی پٹ آ ہندا سال جوڑ جاڑی کاریم نا بناء مریک ، سی پیک ڈٹ انا بنائی تخمینہ 23 ارب روپئی خلنگانے ۔
ڈٹ ارٹ آن مسہ سال پورو کننگک۔ دا ڈٹ آن ہزارآتا کچ اٹ ہندی بندغ آتے روز گار نا وارخواہی دوبریک ۔او پارے کہ گوادر بالی پٹ اتون اوار اوار گوادر ماسٹر سٹی پلان ،ایسٹ بے ایکسپریس وے ، گوادر ہسپتال نا اپ گریڈیشن و آبنوشی ڈٹ آتیا ہم کاریم ءِ ترند کننگانے۔ ڈٹ آتا پوروی آن گوادر پوسکن آشار تا صف اٹی اوار مریک ۔ او پاریرکہ چینی حکومت نا کنڈآن گوادر انٹر نیشنل بالی پٹ نا جوڑ جاڑ کن گرانٹ منظور کننگاسس۔
گرانٹ منظوری آن پد حکومت بالی پٹ نا جوڑ جاڑی ڈٹ آکاریم ءِ ترند کرینے۔بالی پٹ نا جوڑ جاڑ کن 4300 ایکٹر ڈغار جتا کننگانے ، او پاریر کہ حکومت پاکستان سول ایوی ایشن اتھارٹی ءِ دا پروجیکٹ نا ترند تر پوروی ءِ المی جوڑ کننگ ناپارت کرینے۔ذرائع نا رداٹ گوادر نا بندرگاہ آ 230 ملین ڈالرز نا خڑچ آن جوڑ جاڑ مروک آجہانی بالی پٹ آ دنیا نا کل آن بھلا مسافر بردار جہاز ،اے 380 نا دڑنگ ناآسراتی ساڑی مریک ۔ گوادر بالی پٹ نا پوروی آن بلوچستان خاص کر گوادر اٹی پوسکن آ سفری آسراتی دوبریک ، ہراڑآن نئے بیرہ ہن و بر اٹی آسانی مریک بلکن بھلو کچ اسے آ اقتصادی سرجز آتا بناء مریک۔ دا ڈٹ آن ہزارآتا کچ اٹی ہندی خلقتءِ بلا واسطہ و بالواسطہ روزگار نا وارخواہی دوبریک۔
