صدر مملکت ممنون حسین نا اسلام آباد میٹروپولیٹن نا کنڈآن اڈ ہلوک آ دود آن تران

صدر مملکت ممنون حسین نا اسلام آباد میٹروپولیٹن نا کنڈآن اڈ ہلوک آ دود آن تران

اسلام آباد(پاکستان نیوز پوائنٹ 19اگست 2016ء) صدر مملکت ممنون حسین پارینے کہ بلدیاتی گچین کاری تیان گچین نمائندہ غاتا کمک اٹ خلقت آتا ویل آک شیفکو کہول آ ایسر مریرہ و اوڑآن جمہوریت سوگو مریک۔ بلدیاتی گچین کاری تیان خلقت آتا زند اٹی گچینی بریک۔ صدر مملکت داہیت ءِ جشن آجوئی نا چرجوئی ٹی اسلام آباد میٹروپولیٹن نا کنڈآن ایوان صدر اٹی اڈ ہلوک آ دود آن تران کرسا پارے ہراٹی اسلام آباد اٹی بلدیاتی گچین کاری تیٹی گچین مروک آ میئر، ڈپٹی میئرز، وائس چیئرمینزو کونسلرز آک شرکت کریر۔

صدر مملکت اسلام آباد آن گچین مروک آ نمائندہ غاتے مبارکبادی ترسا پارے کہ او تینا فرض ءِ زمہ واری و ایمانداری اٹ ادا کیر و بانی پاکستان قائد اعظم محمد علی جناح نا دا قول ”کاریم “ کاریم و صرف کاریم “ آ ضرور عمل کیر۔ صدر مملکت پارے کہ غٹ گچین نمائندہ غاک مبارکباد نا حقدار ءُ کہ بنجائی دارالحکومت اٹی اولیکو وار گچین مسنو۔ داسا دا اوفتا زمہ واری مریک کہ او شار انا گچینی کن کاریم کیر و اوٹی ہر حد اسکان کار۔

صدر مملکت پارے کہ اسلام آباد دنیا نا زیباانگا دارالحکومت آتیان اسٹ ءِ۔ اوگچین نمائندہ غاتیا زورشاغا کہ او شار ءِ ماڈل شار اس جوڑ کننگ کن اودے مشن نا وڑاٹ ہلیر تانکہ اونا زیبائی ٹی پین ودکی مرے۔ صدر مملکت پارے کہ گچین نمائندہ غاتا کوپہ غاتیا بھلو زمہ واری اس بیٹ مریک کہ او اسلام آباد نا ودوک آ آبادی نا تناسب آن اوٹی ودی مروک آ ویل آتے ہڑدڑی بنداو تیا ایسر کیر۔

و الس نا بنداوی آسراتی تے باوری جوڑ کیر۔ صدر مملکت پارے کہ اسلام آباد میٹروپولیٹن کارپوریشن چونکہ اولیکو وار جوڑ مسنے ہنداخاطران پوسکنا میٹروپولیٹن کارپوریشن نا حیثیت آن اوفتے بے شمار ویل آتا ہم مون مریک۔ اوٹی غٹ آن بھلا ویل شونداری کاریم تے کن مالی وسیلہ غاتا کمتی و جتا ادارہ غاتا نیام اٹ کارندہ و ملازم آتا بشخ و پانٹ نا ءِ ۔ اگہ غٹ نمائندہ غاک شونداری عمل نا چرجوئی ٹی پوروی وڑاٹ متحرک مریرہ تو تینا خواری ، کوشست و تدبر آن او دا مشکلات آتا خاتمہ کیرہ۔

صدر مملکت پارے کہ کچہ انگا آبادی تا جوڑ جاڑ آن بھاز انگا ویل آک ودی مننگ ءُ دامقصد کن ٹھوس ڈٹ بندی نا گرج ءِ۔ دا اہم ویل انا کنڈا توجوہ تننگ نا گرج ءِ۔ صدر مملکت پارے کہ گچین نمائندہ غاک کرپشن نا چٹفنگ کن تینا کڑد ءِ ادا کیر و تینا معاملہ غاتیٹی میرٹ و شفافیت ءِ برقرار تخر۔ صدر مملکت اسلام آباد میٹرو پولیٹن کارپوریشن نا گچین مروک آ میئر شیخ انصر عزیز و ایلو نمائندہ غاتے جشن آجوئی نا چرجوئی ٹی اڈ تروک آ دود آ مبارکبادی تس و پارے کہ دننگا دود آتیان قائد اعظم نا تعلیم آتیا عمل کننگ نا جوزہ ودی مریک۔