جمہوری و معاشی وڑاٹ سوگو پاکستان ننا ویژن ءِ،

اسٹریٹجک پالیسی آ ہچ ءُ سمجھوتہ اس کپنہ، وزیراعظم پاکستان و ترکی دیرینہ دوست ءُ، پاک بحریہ نا فلیٹ ٹینکر ، ہمیش پاک ترک سنگتی نا علامت نا وڑاٹ یات تخنگک حکومت غٹ تکنیکی بشخ آتیٹی خود انحصاری نا پالیسی ٹی کمکاری ءِ برجاتخک، گوادر ءِ بنجااس جوڑ کرسا علاقائی واپار و ٹرانس شپمنٹ نا کمک اٹ زیات آن زیات فائدہ غاتا دوئی ساڑی آ حکومت نا عزم ءِ وزیراعظم محمد نواز شریف نا کراچی شپ یارڈ اٹی ترک شپ بلڈنگ فرم نا کمک اٹ جوڑ کروک آ 17 ہزار ٹن فلیٹ ٹینکر نا افتتاحی دود آن تران

جمہوری و معاشی وڑاٹ سوگو پاکستان ننا ویژن ءِ،
اسٹریٹجک پالیسی آ ہچ ءُ سمجھوتہ اس کپنہ، وزیراعظم پاکستان و ترکی دیرینہ دوست ءُ، پاک بحریہ نا فلیٹ ٹینکر ، ہمیش پاک ترک سنگتی نا علامت نا وڑاٹ یات تخنگک حکومت غٹ تکنیکی بشخ آتیٹی خود انحصاری نا پالیسی ٹی کمکاری ءِ برجاتخک، گوادر ءِ بنجااس جوڑ کرسا علاقائی واپار و ٹرانس شپمنٹ نا کمک اٹ زیات آن زیات فائدہ غاتا دوئی ساڑی آ حکومت نا عزم ءِ وزیراعظم محمد نواز شریف نا کراچی شپ یارڈ اٹی ترک شپ بلڈنگ فرم نا کمک اٹ جوڑ کروک آ 17 ہزار ٹن فلیٹ ٹینکر نا افتتاحی دود آن تران

کراچی۔(پاکستان نیوز پوائنٹ 19اگست 2016ء) وزیراعظم محمد نواز شریف پارینے کہ جمہوری و معاشی وڑاٹ سوگو پاکستان ننا ویژن ءِ ، اسٹریٹجک پالیسی آ ہچ ءُ سمجھوتہ اس کپنہ، کراچی شپ یارڈ اٹی ترکی نا شپ بلڈنگ فرم نا کمک اٹ جوڑ کروک آ 17 ہزار ٹن فلیٹ ٹینکر نا تخوک آ وخت آن اِرا تو مست پوروی آ کراچی شپ یارڈ، پاک بحریہ و دفاعی پیداوار نا وزارت ءِ مبارکباد ترسا وزیراعظم پارے کہ ترکی آن ننا راجی، سماجی و تہذیبی تعلقداری ءِ ۔

دفاع نا بشخ اٹی ہڑتوم آ ملک آتا کمک ءِ پین مون آ دینہ۔ پاکستان و ترکی دیرینہ دوست ءُ، پاک بحریہ نا فلیٹ ٹینکر ہمیش پاک ترک سنگتی نا علامت نا وڑاٹ یات تخنگک، حکومت غٹ تکنیکی بشخ آتیٹی خود انحصاری نا پالیسی ٹی کمکاری ءِ برجاء تخک، گوادر ءِ بنجااس جوڑکرسا علاقائی واپار و ٹرانس شپمنٹ نا کمک اٹ زیات آن زیات فوائد نا دوئی ساڑی حکومت نا عزم ءِ۔

داخیال آتا درشانی ءِ او جمعہ آ داڑے کراچی شپ یارڈ اٹی ترک شپ بلڈنگ فرم انا کمک اٹ جوڑ کروک آ 17 ہزار ٹن فلیٹ ٹینکر نا لانچنگ دود آن بحیثیت مہمان خاص تران کرسا کرے۔ فلیٹ ٹینکر جمعہ آ کراچی شپ یارڈ اینڈ انجینئرنگ ورکس اٹی مروک آ اسہ پروقار دود اسے ٹی لانچ کننگا۔ دود اٹی گورنر سندھ ڈاکٹر عشرت العباد خان، وزیراعلیٰ سندھ سید مراد علی شاہ ، بنجائی وزیر خزانہ سینیٹر اسحاق ڈار، وزیر دفاع خواجہ محمد آصف، بنجائی وزیر دفاعی پیداوار رانا تنویر ، پاک بحریہ نا سروک ایڈمرل محمد ذکا ء اللہ، درملکی قونصل جنرلز و سول و ملٹری کمامدار آک شرکت کریر ۔

وزیراعظم محمد نواز شریف 17 ہزار ٹن فلیٹ ٹینکر جوڑ کننگ آ کراچی شپ یارڈ و ترکی نا شپ بلڈنگ فرم ءِ مبارکباد ترسا پارے کہ دا گام آن دفاعی پیداوار نا بشخ اٹی و جنگی جہاز آتا تیاری ٹی خاص کر پاک ترک تین پہ تینی اواری ٹی ودکی نا گمان آک ودی مریرہ۔ وزیراعظم پارے کہ دا پروجیکٹ دفاعی پیداوار اٹی خود انحصاری دوئی کننگ اٹی اہم کڑد ادا کیک۔ حکومت غٹ تکنیکی بشخ آتیٹی خودانحصاری نا پالیسی ٹی کمکاری ءِ برجا تخک۔

وزیراعظم پارے کہ گوادر ءِ بنجاء اس جوڑ کرسا علاقائی واپار و ٹرانس شپمنٹ نا کمک اٹ زیات آن زیات فائدہ غاتا دوئی حکومت نا عزم ءِ و پاک چین اقتصادی راہداری تون اوار ملک اٹی ساڑی آ شونداری ڈٹ ننا دا عزم اٹی کمکار ءِ۔ وزیراعظم محمد نواز شریف کراچی شپ یارڈ نا عملہ و انتظامیہ نا کوشست آتا ستاءِ کرے ہراک دا ادارہ ءِ کٹیا کروک و کارگر جوڑ کننگ اٹی تینا کڑدءِ ادا کریر۔

اوپارے کہ کراچی شپ یارڈ سرکاری بشخ اٹی سرسہبی نا اسہ شون و شان مثل اسے ہراڑآ ایلو ادارہ غاتے ہم عمل کروئی مرے۔ وزیراعظم محمد نوازشریف پارے کہ تخوک آ وخت آن اِرا تو مست جہاز جوڑ کننگ قوم اکن 70می آجوئی دے آ ٹیکی اسے۔ وزیراعظم کراچی شپ یارڈ نا ملازم آتے کن 100 ملین روپئی نا بونس نا ہم پڑو ءِ کرے ۔ وزیراعظم محمد نواز شریف نا فیتہ ءِ کاٹ کننگ آن پد جہاز ءِ سمندر اٹی دڑفنگا۔

داکان مست کراچی شپ یارڈ اینڈ انجینئرنگ ورکس نا منیجنگ ڈائریکٹر ریئر ایڈمرل سید حسن ناصر شاہ تینا خطبہ استقبالیہ ٹی پارے کہ دا جہاز داوخت اسکان پاکستان اٹی جوڑ مروک آ غٹ آن بھلا جہاز ءِ۔ اوپارے کہ مسکوہی ٹی کراچی شپ یارڈ اینڈ انجینئرنگ ورکس سرسہبیاتون پاک بحریہ نا چندی جنگی جہاز جوڑ کرینے۔ اوپارے کہ پاک بحریہ 4 آبدوز جوڑ کننگ نا بھلا ڈٹ کراچی شپ یارڈ ءِ ترسا اونا لائخی تیا پت انا درشانی ءِ کرینے ہراکہ چین نا اشتراک آن پورو کننگک۔

اوپارے کہ کراچی شپ یارڈ ہشت ہزار ٹن وزنی جہاز ءِ ہرفنگ و اسہ جاگہ غان ایلو جاگہ منتقل کننگ نا نظام ءِ نصب کننگ نا کاریم ہم برجاء تخانے ہراڑآن نہ صرف جہاز سازی و جوڑ جاڑ نا لائخی بلکن کٹیا ٹی ہم ودکی مریک و روزگار نا وارخواہی ہم ودی مریک۔ دا جہاز جدیدطبی آسراتی تیان ہم لیس ءِ ہرا جنگ و امدادی آپریشن نا وخت آ پاک بحریہ نا ایلو جہاز آتے ہم امداد فراوان کننگ نا لائخی تخک۔