کراچی(پاکستان نیوز پوائنٹ 19اگست 2016ء) وزیراعظم محمد نواز شریف جمعہ آ داڑے ترکی نا کمک اٹ تروک کروک آ پاک بحریہ نا بھلا وارشپ فلیٹ ٹینکر نا افتتاح ءِ کرے۔ داوخت آ اڈ ہلوک آ دود اٹی پاکستان و ترکی نا بڑزکو کمامدار و پاک بحریہ نا افسر و کارندہ غاک شرکت کریر۔ وزیراعظم فیتہ ءِ کاٹ کرسا فلیٹ ٹینکر نا افتتاح ءِ کرے۔ کراچی شپ یارڈ انا پلیٹ فارم آ فیتہ ءِ کاٹ کننگ آن پد 17 ہزار ٹن نا فلیٹ ٹینکر ءِ ٹگ بوٹ انا کمک اٹ سمندر اٹی دڑفنگا ۔
دا فلیٹ ٹینکر وزارت دفاعی پیداوار و پاک بحریہ نا رداٹ ترکی نامیسرز سوونما ٹیکنو لوگیلر محندیسلک تیار کرینے۔ پاک بحریہ نا دا فلیٹ ٹینکر لاجسٹک گرج آتے پورو کننگ اٹی کمکار ثابت مریک۔ دافلیٹ ٹینکر نا ڈیزائن ءِ ترکی جوڑ کرینے و اودے کراچی شپ یارڈ و انجینئر نگ ورکس تیار کرینے۔ فلیٹ ٹینکر نا ڈیزائن عصری گرج آتیان ہم آہنگ ءِ۔ تینا پوسکناڈیزائن نا سوب آن دا فلیٹ ٹینکر دنیا نا ہر بندرگاہ غا بآسانی لنگر انداز مننگ کیک۔
