کوئٹہ(پاکستان نیوز پوائنٹ 18اگست 2016ء) وزیراعلیٰ بلوچستان نواب ثناء اللہ خان زہری پارینے کہ سول ہسپتال کوئٹہ خودکش جلہو اٹی بھارت اوارے، بلوچستان نا محب وطن الس ہمیش دہشت گردی نا برخلاف حکومت تون تفینے، ملک آن پیشن تولوک آ بندغ آک تینا ذاتی مفاد آتے کن بے گناہ خلقت آتا زند آتون گوازی کننگ ءُ ، دہشت گرد آتے ہچ ءُ دروشم اسے ٹی بشخپنہ، شہید آتا خاہوت آتا عزم ءِ سلام پیش کیوہ۔
داخیال آتا درشانی ءِ او لاء کالج کوئٹہ ٹی ڈیوٹ بلوچستان نا کنڈآن بھارتی نیام تمنگ نا برخلاف اڈ ہلوک آ دود آن تران کرسا کرے۔ وزیراعلیٰ بلوچستان نواب ثناء اللہ خان زہری پارے کہ بلوچستان نا حالیت آتے خراب کننگ اٹی بھارت اوارے ، دہشت گردی نا چٹفنگ کن انت کہ قربانی اس تروئی تمک اونن ایتنہ، اوپارے کہ کوئٹہ دھماکہ ”را“ کرفے ہرانا ثبوت ساڑی ارے۔
وزیراعلیٰ بلوچستان پارے کہ ننا اولیکو دے آن موقف ہندامسنے کہ سانحہ سول ہسپتال اٹی بھارتی اودیم ادارہ اوارے۔ انڈیا ءِ بلوچستان نا تہہ نا معاملہ غاتیٹی نیام تمنگ نا موکل تفنہ ، وکلاء و صحافی تا شہیدی آن ہرا خلا ودی مسنے او کیہی سال آتسکان پُر مننگ کپک، بھارتی وزیراعظم نریندر مودی نا بلوچستان نا بابت آن بیان ننا موقف نا تائید ءِ کرینے۔
اوپارے کہ دہشت گرد آک کنا مار، ایلم نا مار و ایلم ءِ ہم کنے آن پلار اوپارے کہ ملک آن پیشن تولوک آ نام نہاد لیڈر ہمسایہ ملک آتیان فنڈز ہلیرہ ، ساڑی ہی ٹی براہمدغ بگٹی نا بیان دانا ثبوت ءِ۔ اوپارے کہ ننا عزم ءِ کہ نن دہشت گرد آتے بلوچستان اٹی پناہ ہلنگ کن الیپنہ۔ اوپارے کہ بلوچستان ننا وطن ءِ ننا باوہ و پیرہ غاک پاکستان تون الحاق کریر اینو مچ آ بلوچستان اٹی بھارتی وزیراعظم نا بیان نا برخلاف الس سراپا برانز جوڑ مسنو ہرا داہیت انا ثبوت ءِ کہ بلوچستان نا الس بھارتی نیام تمنگ ءِ ہرگز سگنگ کپک۔
اوپارے کہ بھارتی وزیراعظم بلوچستان اٹی نیام تمنگ آن بیدس کشمیری تے تینا حق خودارادیت ایتے۔ دود آن وزیر داخلہ بلوچستان سرفراز بگٹی ، حکومت بلوچستان نا ترجمان انوارالحق کاکڑ ، جان اچکزئی تون اوار ایلوک ہم تران کریر۔
