اسلام آباد(پاکستان نیوز پوائنٹ 18اگست 2016ء) وزیراعظم محمدنوازشریف دہشت گردی نا زہمی تے کن جامع پالیسی اس وضع کننگ ناپارت کرینے ہرا تپاخت کروک آ بندغ آتا خاہوت آتے کن کٹیا، تعلیم و روزگار نا پیکج نا حامل مرے۔ اوداپارت ءِ پنچ شنبے آ داڑے بنجائی کابینہ نا دیوان نا کماشی ءِ کرسا تس۔ تلاوت کلام پاک آن گڈ بنجائی کابینہ کوئٹہ ٹی دہشت گردی نا ساڑی آ واقعہ ٹی تپاخت کروک آ بندغ آتے کن فاتحہ خوانی کرے۔
وزیراعظم پارت کرے کہ مچ آ ملک اٹی دہشت گردی نا زہمی تیکن جامع پالیسی اس وضع کننگے، دا پالیسی تپاخت کروک آ بندغ آتا خاہوت آتے کن مربوط کٹیا، تعلیم و روزگار نا پیکج نا حامل مرے، داپالیسی ءِ غور اکن بروک آ کابینہ دیوان اٹی پیش کننگک۔ پاک۔ چین اقتصادی راہداری نا بارواٹی سرجم احوال تننگ ناوخت آ وزیراعظم داہیت آ زور شاغاکہ پروگرام اٹی اوار ڈٹ آک حکومت نا اولین اولیت ءُ ہنداخاطران بروخت پیش رفت ءِ باوری جوڑ کننگ کن پبی کوشست کننگے۔
وزارت ڈٹ بندی ، شون و اصلاحات ءِ پارت کننگاکہ او توانائی و بنداوی ڈھانچہ نا بشخ آتیٹی اولین ڈٹ جات آتا 2017-18 ء اسکان پوروی ءِ باوری جوڑ کے۔ اوپارے کہ ارلی ہارویسٹ ڈٹ آتا پوروی 2018 ء نا تیرمہ اسکان لوڈشیڈنگ نا خاتمہ ٹی بھاز کمکار مریک۔ وزیراعظم محمد نواز شریف پارے کہ پاک چین اقتصادی راہداری نا دیکی روٹ آ نمان پیش رفت مننگ ءِ ، ہندی آبادی کن روزگار نا وارخواہی ودی مریک ہرافتے آن اقتصادی سرگرمی جنم ہلیک و قومی دولت اٹی ودکی مریک۔
اوپارے کہ سی پیک آن بے کچ پسماندہ علاقہ غاتون اوار پاکستان نا جتا بشخ آتیٹی اسہ وڑ فائدہ باوری مریک ، اوڑآن نہ صرف پاکستان نا 20 کرڑ الس باہم منسلک مریرہ بلکن مچ آ ڈیہہ نا الس، کمیونیٹیز و ریاست آتا نیام اٹ کمکاری نا کسک ہم ملنگرہ۔ کابینہ ءِ پاننگاکہ سی پیک نا رداٹ کل کچ انا نمان بشخ عمل پذیر ءِ وخت اس کہ ایلو پیپ لین اٹی ءُ۔ وزیراعظم تھرکول ڈٹ اکن تینا پبی مخ تفی نا درشانی ءِ کرسا پارے کہ اگہ 50 سال مست اونا لائخی آن استفادہ کننگاکہ تو قوم داسا توانائی نا برآمد کنندہ مسکہ۔
گوادر پورٹ پروجیکٹ و اوڑتون ایب و کیب انفراسٹرکچر آسراتی تیا داوخت اسکان مروک آ پیش رفت نا ہم دیوان اٹی جاچ ءِ ہلنگا۔ وزیراعظم تعلقدار محکمہ غاتے گوادر ہوائی اڈہ و ایسٹرن ایکسپریس وے آ زوت آن زوت کاریم نا بناء آ پیش رفت کننگ نا پارت کرے۔ اوپارے کہ گوادر نا ٹیکنیکل اینڈ ووکیشنل ٹریننگ انسٹی ٹیوٹ آ کاریم ترند تر بنداو تیا کننگے اخس کہ زوت مرے اودے فعال جوڑ کننگے۔
وزیراعظم تعلقدار وزارت آتے پارت کرے کہ پن بجلی ڈٹ آتے کن ڈغار نا دوئی نا عمل ءِ ترند کرسا توانائی و بنداوی ڈھانچہ نا اجزاء تتون اوار جمی اقتصادی شون اکن پیش بین حکمت عملی اختیار کننگے تانکہ بروک آ نسل آتا گرج آک پورو مریر۔ کابینہ سرکاری ملازم آتے ریٹائرمنٹ آن مست ہنکین یا پلاٹ آتا فراوانی نا مقصد نا رداٹ نجی بشخ انا اشتراک آن لینڈ ڈویلپمنٹ کن جوائنٹ وینچر پالیسی نا بابت آن ہاؤسنگ ورکس ڈویژن نا سمری نا اصولی منظوری ءِ ترسا پالیسی راہشون اصول آتے پین گچین جوڑ کننگ کن اسہ کمیٹی اس اڈ تس۔
داپالیسی بنجائی حکومت نا اسہ لکھ ملازم آتے پلاٹ آتا فراوانی نا حامل ءِ۔ وزیر ہاؤسنگ و تعمیرات اکرم خان درانی ، وزیر داخلہ چوہدری نثارعلی خان و وزیرکانود زاہد حامد آ تالان مریک و دا پین باسک اسے اوٹی اوار کننگ کیک۔ دا کمیٹی کابینہ ءِ تینا رپورٹ ءِ پیش کیک۔ کابینہ پاکستان و ترکمانستان نا نیام اٹ دفاعی کمک نا بارواٹی ایم او یو نا منظوری ءِ تس۔
پاکستان و جاپان (جائیکا) نا نیام اٹ توانائی نا بشخ آتا اصلاحات آتا پروگرام IIکن کڑز معاہدہ غا دستخط نا ہم موثر بہ مسکوہی منظوری تننگا۔ کابینہ سرکاری بشخ انا آڈیٹنگ اٹی کمکاری نا بارواٹی ملائیشیا نا نیشنل آڈٹ ڈیپارٹمنٹ و پاکستان نا آڈیٹر جنرل آفس نا نیام اٹ مفاہمت نا یات داشت آتیا ہیت وگپ نا منظوری ءِ تس۔ داکان بیدس سرکاری بشخ انا آڈیٹنگ اٹی کمکاری نا بارواٹی ویتنام نا اسٹیٹ آڈٹ آفس و سپریم آڈٹ انسٹیٹیوشن آف پاکستان نا نیام اٹ ہڑتوم آ کنڈآتا ایم او یو آ دستخط نا ہم منظوری تننگا۔
کابینہ اسٹیٹ بینک آف پاکستان و روس انا سنٹرل بینک نا نیام اٹ بینکاری چاروکی کمکاری نا بارواٹی ایم او یو آ دستخط کن ہیت وگپ نا بناء نا منظوری ءِ تس۔ پاکستان و ترکمانستان نا نیام اٹ سفارتی پاسپورٹ تخوک آتا ویزہ ختم کننگ نا معاہدہ غا دستخط نا ہم منظوری تننگا۔ پاکستان و قزاخستان نا نیام اٹ ڈوہدار تا تبادلہ نا بارواٹی معاہدہ غا دستخط نا ہم منظوری تننگا۔ پاکستان و کینیا نا نیام اٹ غیر کانودی ہن وبر و منشیات آتا توننگ اٹی کمکاری نا بارواٹی ایم او یو آ دستخط نا رداٹ ہیت وگپ نا بناء نا ہم منظوری تننگا۔
