اسلام آباد(پاکستان نیوز پوائنٹ 18اگست 2016ء) بنجائی وزیر موسمیاتی تبدیلی زاہد حامد پارینے کہ پاکستان ماحولیات آن بابت اینخو سال نومبر اٹی کانفرنس آف پارٹیز سی او بی 22اٹی پبی و فعال شرکت کیک۔ او پنچ شنبے آ سی او بی 22نا تیاری تا چرجوئی ٹی اڈ ہلوک آ دیوان نا کماشی ءِ کریکہ۔ پاکستان اٹی فرانس نا سفیر مارٹین ڈارنس، مراکش نا سفیر مصطفی صلاح دین ، ادارہ رکھ ماحولیات ، پنجاب ، یو این ڈی پی، وزارت دیر و بجلی ، وزارت خزانہ، وزارت موسمیاتی تبدیلی، صوبائی ڈیزاسٹر مینجمنٹ اتھارٹی خیبر پختونخواہ ، ادارہ رکھ ماحولیات سندھ، وزارت خارجہ امور، نیشنل یونیورسٹی آف سائنس و ٹیکنالوجی ، قائد اعظم یونیورسٹی اسلام آباد، ایس ڈی پی آئی، انٹرنیشنل یونین آف کنزر ویشن آف نیچر و محکمہ موسمیات پاکستان نا نمائندہ غاک دیوان اٹی شرکت کریر۔
داوخت آ بنجائی وزیر پارے کہ نن بروخت و پٹ وپول آ تخوک آئی این ڈی نا اڈتننگ کن چاہندار آتا ٹیم اس جوڑ کرینن، اوڑآن موسمیاتی تبدیلی نا زئم آتے کم کننگ و مطابقت ودی کننگ آن بابت کوشست آتیٹی کمک رسینگک۔ اوپارے کہ ننے کانفرنس آف پارٹیز سی او پی ۔ 21نا آزموندہ غان ہیل کرسا سی او پی ۔22 اٹی فعال شرکت کروئی مریک۔ داوخت آ آئی این ڈی سیز چاہندار آتا ٹیم انا ڈپٹی ہیڈ ڈاکٹر بلال انور دیوان اٹی پٹ وپولی سرجزآتیان بابت پریزنٹیشن تس۔
