سدرن کمانڈ لیفٹیننٹ جنرل عامر ریاض نا انسٹیٹیوٹ آف میڈیکل سائنسز کوئٹہ کینٹ نا دورہ نا وخت آ درشان خیال

سدرن کمانڈ لیفٹیننٹ جنرل عامر ریاض نا انسٹیٹیوٹ آف میڈیکل سائنسز کوئٹہ کینٹ نا دورہ نا وخت آ درشان خیال

کوئٹہ۔(پاکستان نیوز پوائنٹ 17اگست 2016ء) پاک فوج صوبہ ٹی تعلیمی معیار نا گچینی کن ہروڑگام گیج کننگ اٹی ءِ ، کالج اٹی بڑزکو نظم و ضبط و گچین طبی تعلیم نا فراوانی کن ہروڑنا کوشست کننگ انگ ءِ۔ داخیال آتا درشانی ءِ او کمانڈ سدرن کمانڈ لیفٹیننٹ جنرل عامر ریاض انسٹیٹیوٹ آف میڈیکل سائنسز کوئٹہ کینٹ نا دورہ نا وخت آ ہیت وگپ کرسا کرے۔ پرنسپل کمز کمانڈ سدرن کمانڈ ءِ کالج آ بننگ آ بخیرٹ پارے و کالج نا فیکلٹی تون درستی راستی کرفے۔

کمانڈنٹ کمز بریگیڈیئر محمد علیم بریفنگ ترسا پارے کہ کالج صوبہ ٹی معیاری طبی تعلیم کن کوشست کننگ اٹی ءِ و داوخت آ کالج اٹی 500 نا خڑک طالب علم خواننگ ءُ ہرافتے پوسکنا وڑوڈول آتیا طبی تعلیم تننگ انگ ءِ۔ داوخت آ کمانڈر سدرن کمانڈ پارے کہ پاک فوج صوبہ ٹی تعلیمی معیار نا گچینی کن ہر وڑنا گام گیج کننگ ءِ طبی بشخ انا اہمیت آن انکار مننگ کپک طالب علم آک ملک انا آخبت ءُ اوفتے مون آ ہنسا ملک و صوبہ نا پن ءِ روشنا کروئی ءِ۔

صوبہ بلوچستان اٹی تعلیمی پسماندگی نا چٹفنگ کن ہروڑ کمک کننگ انگ ءِ۔ کالج اٹی بڑزکو نظم و ضبط و گچین طبی تعلیم نا فراوانی نا ہروڑکوشست کننگ انگ ءِ۔ چنکو وخت اسے ٹی کالج مچ آملک اٹی بھلو ہند اس دوئی کرینے۔ اوکالج اٹی ڈینٹل کالج نا زوت آن زوت اڈتننگ کن احکامات جاری کرے۔ داکان بیدس او ڈیجیٹل لیب، فورنسیک و ایلو ڈیپارٹمنٹ نا معائنہ ءِ کرے۔

طالب علم آتون اوڑدہی نا وخت آ اوبلوچستان نا مر مر انگا علاقہ غاتا طالب علم آتون ہیت وگپ کرے و اوفتا تعلیمی کوشست آتا ستاءِ کرے۔ اوپارے کہ تعلیم ءِ پورو کننگ آن گڈ اوفتے تینا علاقہ غاتیٹی تینا خذمت انجام تروئی مرے تانکہ جان جوڑی نا آسراتی پسماندہ علاقہ غاتے ہم دومننگ کے۔ داوخت آ پرنسپل پروفیسر ڈاکٹر ارباب عبدالودود، بریگیڈیئر آئی ایس بریگیڈیئر محمد رمضان ، کمانڈنٹ سی ایم ایچ بریگیڈیئر سلمان احمد ، کمانڈنٹ 21ایم ڈی سی بریگیڈیئر ندیم احمد رانا ، فیکلٹی باسک و ایلوفک ہم ساڑی ئسر۔