اسلام آباد(پاکستان نیوز پوائنٹ 17اگست 2016ء) وزیر داخلہ چوہدری نثارعلی خان پارینے کہ کراچی ٹی خلقت آتا ہرفنگ نا بابت صوبائی حکومت آن ورندی ہلسا ایوان ءِ معلومدار کننگک، ڈی جی رینجرز آن ہم دا چرجوئی ٹی تینٹ ہیت کیوہ و اونا جاست و پاست ءِ ہم کرفنگک۔ چارشنبے آ قومی اسمبلی نا دیوان اٹی ایم کیو ایم نا باسک اقبال محمد علی خان نا اعتراضی ٹک آ پارے کہ کراچی ٹی ننا ہشت کارندہ غاتے تدوک آ دے ہرفنگا۔
وزیر داخلہ اونا نوٹسءِ ہلے ہراڑآ اسپیکر پارے کہ داصوبائی معاملہ اسے و صوبائی حکومت تون ہیت کینہ۔ اقبال محمد علی خان پارے کہ دا تعصبانہ کارروائی اسے۔ اونا ورندی ٹی وزیر داخلہ چوہدری نثارعلی خان پارے کہ فاضل باسک انتس کہ پارینے ، اگہ او درست ءُ تو قابل مذمت ءِ۔ وزیر داخلہ پارے کہ اسپیکر نا پاننگ درست ءِ کہ دا صوبائی معاملہ اسے واہم ایوان اٹی ہراتم معاملہ اس چست کننگے تو اونا بایدے ورندی برے۔
وزیر داخلہ پارے کہ پگہ اسکان نا وخت تننگے، سندھ انا صوبائی حکومت و ڈی جی رینجرز تون او تینٹ ہیت کیک۔ اونا جاست وپاست ءِ کرفنگک۔ ننے ایلو کنڈ انا نکتہ نظر ءِ معلوم کروئی ءِ۔ اوپارے کہ انتس کہ کنا آئینی دنگ اٹی ارے، اودے ضرور کیوہ۔ پولیس ناحراست اٹی اسہ تپاخت آ عدالتی جاست وپاست کرفنگ کن سندھ حکومت تون رابطہ کننگانے۔ وزیر داخلہ پارے کہ کرسیک کارہ بریرہ ننے اللہ ءِ ورندی تروئی ءِ۔ رینجرز بنجاء نا فورس ءِ ولے کراچی ٹی او صوبائی حکومت نا ماتحت کاریم کیرہ، رینجرز یا پولیس ءِ ہراوڑ آپریشن کروئی ءِ دا صوبائی حکومت نا کاریم ءِ ولے سیاسی، اخلاقی ، آئینی و کانود وڑٹ انتس کہ کننگ کیک اودے کیک۔
