بنجائی وزیر داخلہ چوہدری نثارعلی خان نا قومی اسمبلی ٹی شیریں مزاری و عارف علوی نا اعتراضی ٹک آ درشانِ خیال

بنجائی وزیر داخلہ چوہدری نثارعلی خان نا قومی اسمبلی ٹی شیریں مزاری و عارف علوی نا اعتراضی ٹک آ درشانِ خیال

اسلام آباد(پاکستان نیوزپوائنٹ 16اگست 2016ء) بنجائی وزیر داخلہ چوہدری نثارعلی خان پارینے کہ پاکستان آن ڈی پورٹ کروک آ امریکی شاری ءِ ویزہ تننگ و پاکستان اٹ پترینگ انگ نا زمہ وار آتا برخلاف کارروائی کننگ انگ ءِ ، دا امریکی شاری پاکستانی نیاڑی اسے تون برام کرینے وخت اس کہ اونا اِرا چناہم اریر ہرا اوڑتون امریکہ ٹی رہینگ انگ ءُ ، اونا برخلاف بنائی جاست و پاست اٹی جاسوسی نا ہچ ءُ ثبوت اس ملیتو، سانحہ کوئٹہ نا بابت آن گڑاس شاہدی مون آ بسنے، نیشنل ایکشن پلان آ عملدرآمد ہمووخت اسکان مننگ کپک ہراوخت اسکان ہر چار آ وزیراعلیٰ دابابت آن جاچ دیوان آتیٹی شریک مفسہ، نیشنل ایکشن پلان نا 20 ٹک آتیان 9 صوبہ و 8 بنجائی وزارت آتیان تعلقدار ءُ ۔

سے شنبے آ قومی اسمبلی نا دیوان اٹی اعتراضی ٹک آ ڈاکٹر شیریں مزاری پارے کہ پاکستان آن مسکوہی ٹی ڈی پورٹ مروک آ امریکی شاری ہمہ پاکستان آ پدی بس و ادے ولدا پدی ہِننگ نا موکل تننگ نا احوال آک ءُ۔ ڈاکٹر عارف علوی پارے کہ کوئٹہ واقعہ نا بابت آن ہم تازہ ترین احوال آتیان ایوان ءِ معلومدار کننگے۔ اونا ورندی ٹی وزیر داخلہ چوہدری نثارعلی خان پارے کہ دابندغ ءِ 48 گھنٹہ آن بیدس 24 گھنٹہ ٹی ویزہ تننگا۔

او انت خوبی اس ئس کہ اودے 24گھنٹہ ٹی ویزہ تننگا او ویزہ ٹی خالی جاگہ غاتے ہلانے و گڑاس جاگہ غاتے او yesو no ہڑتوم آتیٹی ورندی تسنے۔ دامعاملہ نا چھان بین مننگ ءِ۔ وزارت خارجہ ہی گچین ورندی تننگ کیک۔ وزارت داخلہ دامعاملہ نا چھان بین ءِ کپننگ ءِ نن دا معاملہ ءِ ایسری انجام اسکان سرکینہ۔ اوپارے کہ بیرٹ پنی امریکی شاری ءِ 2011ء ٹی فتح جنگ نا خڑک سیکورٹی کارندہ غاک ہلکر، اوڑآن ہچ ءُ نقشہ اس دوئی متو۔

اونا پاکستانی مالم وکیل اسے۔ او باقاعدہ سپریم کورٹ اٹی کیس کرینے۔ سپریم کورٹ نا فیصلہ آن گڈ اودے ڈی پورٹ کننگا۔ نن جی آئی ٹی اس تشکیل تسن ہرانا شش دے آن گڈ رپورٹ بسنے ہراٹی پاننگانے کہ جاسوسی نا ہچ ءُ شاہدی اس ملتنے۔ اونا اُرائی پاکستانی اسے ہراڑآن اونا اِرا چناءُ ہرا 2011 ء ٹی ڈی پورٹ مننگ نا وخت آاوڑتون امریکہ غا ہناسس۔ اوپارے کہ ہرا ایف آئی اے نا کارندہ آک اودے امیگریشن نا وخت آ کلیئر کریر اونا برخلاف کارروائی کننگانے ۔

ڈی جی امیگریشن و ڈائریکٹر ایف آئی اے آن ہم وضاحت طلب کننگانے۔ ہرا ایف آئی اے نا کارندہ غاک دا بندغ ءِ ہلکونو اوفتے حکومت نا کنڈآن اسہ لکھ روپئی انعام ہم تسنے۔ اوپارے کہ کوئٹہ نا سانحہ نا بابت منہ دزگیری مسنے ۔ واہم گڑاس پاننگ وخت آن مست مریک۔ نن داواقعہ نا ہردے نا بنداو آ مانیٹرنگ ءِ کننگ اُن۔صوبائی حکومت نا کنڈآن اسہ فوٹو اسہ ہور اسے نا نشان ننے دوئی مس۔

فوٹو نا داواقعہ تون ہچ ءُ تعلق اس اف واہم ہورتا نشان نا تصدیق مسنے۔ دا بندغ نا پشین آن تعلق ءِ۔ نن تصدیق کرینن او ہم دھماکہ نا زہمی بندغ پیش تمانے۔ داوخت اسکان دوئی شاہدی تیان ننے ہچ اس ملیتنے۔ جلہو گیر نا کاٹم داخہ در ٹکر مسوسس کہ اوڑآن ہچ ءُ کسر اس ملپننگ ءِ واہم انٹیلی جنس ادارہ غاک شواہد ایسر کینو ہرافتے آ کاریم مننگ ءِ۔ اوپارے کہ نیشنل ایکشن پلان آ سہی وڑاٹ عملدرآمد ہمووخت آ ہی مننگ کیک ہراتم وزیراعظم نا کماشی ٹی مروک آ ماہانہ دیوان اٹی ہر چار آ صوبہ غاتا وزیراعلیٰ تے خوائفنگک۔

نیشنل ایکشن پلان نا 20 ٹک آتیان 9 صوبہ و 8 بنجائی وزارت آتیان تعلقدار ءُ۔ اوپارے کہ فیصلہ سروک آتا کہول آ مریر۔ کمیٹی ہنداخاطران اڈتننگانے کہ اوٹی اوار باسک آک تینا تینا سروکیءِ حالیت آتیان معلومدار کننگ کیر۔