چوہدری نثارعلی خان تون چین نا سفیر نا اوڑدہی ، کوئٹہ ٹی دہشت گردی نا مذمت، قیمتی انسانی جان تا نسخان آ ڈکھ و غم نا درشان

اسلام آباد(پاکستان نیوزپوائنٹ 15 اگست2016ء) وزیرداخلہ چوہدری نثارعلی خان تون چین نا سفیر سن وی ڈانگ دوشنبے آ داڑے اوڑدہی کرے۔ چین نا سفیر کوئٹہ ٹی دہشت گردی نا واقعہ نا ترندی اٹ مذمت ءِ کرے و قیمتی انسانی جان تا نسخان آ ڈکھ وغم نا درشانی ءِ کرے۔ وزارت داخلہ نا کنڈآن جاری بیان نارداٹ چینی سفیر پارے کہ دہشت گردی نا برخلاف جنگ اٹی چینی حکومت و الس تینا پاکستانی ایلم تون تفوک ءُ۔

چین ڈیہہ نا امن کن پاکستانی کوشست آتا ستاءِ کرے۔ چینی سفیر پارے کہ چین وپاکستان نا دیرینہ و بے لوث سنگتی امن و شون مخالف واک آتے کن فریشانی نا سوب ءِ واہم ہچ ءُ طاقت اس ہڑتوم آ ملک آتا سنگتی نا کسر اٹی اڑاند جوڑ مننگ کپک۔ وزیر داخلہ چوہدری نثارعلی خان پارے کہ ہڑتوم آ ملک آتا سٹریٹجک تعلقداری ڈیہہ ٹی پائیدار امن و شون نا ضامن ءِ۔ اوپارے کہ پاکستان سی پیک ڈٹ ءِ زوت ایسری اسکان سرکننگ کن پرعزم ءِ۔ چینی انجینئر ز و ورکرز آتا سیکورٹی ءِ باوری جوڑ کننگ ننا اولین اولیت ءِ۔