اسلام آباد(پاکستان نیوزپوائنٹ 15 اگست2016ء) دفترخارجہ نا ترجمان نفیس زکریا پارینے کہ پاکستان بھارت تون غٹ ایسر نا چاری ویل آتے مذاکرات نا کمک اٹ ایسر کننگ خواہک۔ اوداخیال آتا درشانی ءِ اسہ انٹرویو اسے ٹی کرے۔ نفیس زکریا پارے کہ پاکستا ن بھارت ءِ کشمیر آ خصوصی مذاکرات نا ہم سلہ تسنے۔ اوپارے کہ پاکستان اسہ پرامن ملک اسے و تینا غٹ ہمسایہ غاتون دوستانہ تعلقداری خواہک۔
اوپارے کہ ڈیہہ ٹی پائیدار امن کن کشمیر نا ویل انا ایسر المی ءِ۔ ترجمان پارے کہ جہانی برادری ءِ ہم دابابت تینا کڑد ءِ ادا کروئی مرے۔ اوپارے کہ پاکستان اقوام متحدہ نا قرارداد آتا روشنی ٹی کشمیری تا است خواہی نا رداٹ کشمیر نا ویل انا ایسری خواہک۔ دفترخارجہ نا ترجمان مقبوضہ کشمیر اٹی بھارتی ظلم انا بارواٹی پارے کہ کشمیری تا کنڈآن آجوئی جہد نا بناء آن داوخت اسکان اسہ لکھ آن زیات کشمیری تینا جان تا نذرانہ ءِ پیش کرینو و 20 ہزار معذور مسنو۔
نفیس زکریا پارے کہ 8 جولائی کشمیری ورناتا شہیدی آن دا جہد آجوئی ٹی پوسکن ءُ جوش و ولولہ اس ودی مسنے۔ داوخت آ 70کشمیری شہید و 6ہزار ٹھپی مسنو وخت اس کہ 500 بھاز ٹھپی ءُ۔ اوپارے کہ بھارتی فوج بے گناہ کشمیری ورنا و چناتے بیداد کننگ کن پیلٹ گن آتے کاریم اٹ ہتنگ ءِ۔ دہشت گردی نا خاتمہ نا بابت اوپارے کہ پاکستان دہشت گردی آن غٹ آن زیات زہمی مسنے و ملکی معیشت ءِ یکو نیم سد ارب دالر نسخان مسنے۔ اوپارے کہ دنیا ءِ دہشت گردی نا برخلاف جنگ اٹی پاکستان نا قربانی تے امنا کروئی مرے۔ دہشت گردی جہانی ویل اس جوڑ مسنے و پاکستان ایلو ملک آتیان دابابت تینا آزموندہ غاتا درشانی ءِ کننگ کن تیار ءِ۔
