اسلام آباد(پاکستان نیوزپوائنٹ 21جون2017ء) صدر مملکت ممنون حسین پارینے کہ ”اسہ خط، اسہ شاہراہ“ نا تصور دنیا ٹی دوررس بدلی تا بنداو ءِ تخانے ہراڑآن پد ڈیہہ ٹی پوسکن آ اسٹریٹجک ڈاکٹر ائن المی مریک۔ اومیت ءِ کہ دا چرجوئی ٹی نیشنل ڈیفنس یونیورسٹی دفاعی تھنک ٹینک نا حیثیت آن اہم کڑد ادا کیک۔ صدر مملکت داہیت ءِ چارشنبے نا دے نیشنل ڈیفنس یونیورسٹی نا 16می کانووکیشن و وارکورس انا سند آتا بشخ وپانٹ نادود آن تران کرسا پارے۔
وار کورس اٹی سلہہ بند فوج و سرکاری ادارہ غاتا سینئر افسر آتیان بیدس 23سنگت ملک آتا 42سینئر افسرآک ساڑی ئسر۔ داوخت آ نیشنل ڈیفنس یونیورسٹی نا صدر لیفٹیننٹ جنرل رضوان اختر ہم تران کرے۔ دود اٹی وزیراعظم نا نیشنل سیکورٹی و ایڈوائزر لیفٹیننٹ جنرل (ر) ناصر جنجوعہ ہم ساڑی ئس۔ صدر مملکت پارے کہ بیست ءُ یک می صدی حیران کن ایجاد و اسٹریٹجک بدلی تا سوب آن اسہ جتا ءُ حیثیت اس تخک۔
پاک چین اقتصادی راہداری و ”اسہ پٹی اسہ شاہراہ“ نا تصور دادنیا ٹی دوررس بدلی تا بنداو ءِ تخانے ہرافتا دفاعی معاملہ غاتون ہم بھلو تعلق اسے۔ اوپارے کہ داڈٹ ڈٹ آتیا ہندن ہندن پیش رفت مرسا کیک، ڈیہہ نا تزویراتی حق آتیٹی ہم بدلی رونما مرسا کیک۔ ہنداوڑ اسہ پوسکن آ اسٹریٹجک ڈاکٹرائن اس المی مریک۔ اواومیت ظاہر کرے کہ نیشنل ڈیفنس یونیورسٹی آخت نا دا چیلنج آتیان ہم جوانی اٹ عہدہ برآء مریک۔
اوپارے کہ گدرینگوک آ مسہ دہائی اٹی ودی مروک آ انتہاء پسندی و دہشت گردی نا رجحان آک مون تروک چیلنج آتیٹی پین ودکی کرینو ہراڑتون مون تننگ کن پاکستان ءِ پدریسہ حالیت جنگ اٹی رہینگوئی تما۔ دامشکل حالیت آتیٹی پاکستانی قوم و اونا ریاستی ادارہ دا امتحان آن سرسہب مسنو۔ حکومت پاکستان و اونا ادارہ غاک نیشنل ایکشن پلان نا رداٹ انتہاء پسندی و دہشت گردی ٹی وجود اٹی بروک آ مشکل جنگ اتون بہادری اٹ مون تسر ۔ اواومیت ظاہر کرے کہ آپریشن ضرب عضب و ردالفساد نا درکار نتیجہ غاک ہم بھاز زوت دوئی مریرہ و وطن عزیز امن و ایمنی نا جاگہ اس جوڑ مریک۔
