اسلام آباد (پاکستان نیوزپوائنٹ 10اگست 2016ء) وزیراعظم محمد نواز شریف پارینے کہ ننا اتحاد ہی شیطانی واک آتے منہ توڑ ورندی تننگ کیک، پاکستان نا حکومت ، الس ، سلہہ بند فوج و قومی سلامتی نا دارہ غاک دہشت گردی نا برخلاف جنگ اٹی یکجاءُ و یکجامریرہ و داجنگ ءِ ایسری انجام اسکان سرکینہ، نن دہشت گردی ءِ ختم کننگ نا ہراعزم ءِ کرینن اودے غیر متزلزل مننگ کن الیپنہ، مست آن زیات مون آ کانہ، ننے ہر بہاآ دانظریہ ءِ شکست تروئی ءِ، نن دا مکروہ عزم ءِ مش تے اٹ ملفنگ آن بیدس آرام اٹ تولپنہ، چین پاکستان اقتصادی راہداری ڈٹ آن روشنا مروک آ گمان آتا وسیع دنیا ننا دژمن تے ہضم مفننگ ءِ ، اوفتا مقابلہ ءِ کننگ کن ننا یکجا مننگ المی ءِ، مقبوضہ کشمیر اٹی بھارتی ظلم آ پاکستان خاموش سلپک، پاکستان ءِ ہر مکتبہ فکر ، عقیدہ ، رنگ و نسل نا خلقت آتے کن رکھوک گل زمین اس جوڑ کننگ ننا مشن ءِ، دا مچ آ قوم و سیاسی جماعت آتا مشن و قائداعظم نا وژن ءِ۔
پاکستان نا انٹیلی جنس ادارہ غاک دے و نن خواری کرسا دہشت گردی ءِ بے سہب جوڑ کننگ اٹی اختہ ءُ۔ چارشنبے آ قومی اسمبلی ٹی سانحہ کوئٹہ غا پالیسی بیان ترسا وزیراعظم محمد نواز شریف پارے کہ کوئٹہ ٹی مروک آ دہشت گردی نا واقعہ کل قوم ءِ سوگوار کرینے، نن دہشت گردی ءِ ختم کننگ نا ہرا عزم ءِ کرینن داواقعہ اآن اودے غیر متزلزل کننگ مفک۔ نن مست آن زیات عزم اتون مون آ کانہ۔
اوپارے کہ گمراہ عنصر آک وخت اس اسماعیلی برادری ءِ کراچی ٹی ٹارگٹ کننگ ءُ تو وخت اس کوئٹہ ٹی ہزارہ برادری ءِ نشانہ جوڑ کننگ ءُ، وخت اس پشاور اٹی چرچ آ جلہو کننگ ءُ تو وخت اس آرمی پبلک اسکول اٹی کودک چناتے نشانہ جوڑ کننگ انگ ءِ۔ مچ آ ملک اٹی ہرتپہ فکر ، ہر شعبہ ہائے زند آن تعلق تخوک آ سرکڑدہ شخصیت آتے نشانہ جوڑ کننگ انگ ءِ۔ اقلیتی برادری نا برخلاف دہشت گردی نا کارروائی نا کارروائیک کننگ انگ ءُ، دننگا عنصر آک الس و پاکستان نا دژمن ءُ ، ننے ہر بہاء آدا نظریہ ءِ شکست تروئی ءِ، اوفتا پد اٹ کارفرما ذہن بے کچ مکروہ ءِ و او پاکستان اٹی امن و ایمنی گچین ہُننگ خواپسہ۔
بلوچستان گچین مرے اوفتے آن برداشت مفک۔ نن او مکروہ عزم ءِ مش تے اٹ ملفنگ آن بیدس آرام اٹ تولپنہ۔ وزیراعظم پارے کہ چین پاکستان اقتصادی راہداری ڈٹ آن روشنا مروک آ گمان آتا وسیع دنیا ننا دژمن تے ہضم مفننگ ءِ ، اوفتا مقابلہ ءِ کننگ کن ننا یکجا مننگ بے حد المی ءِ۔ وزیراعظم پارے کہ ننا اتحاد ہی شیطانی واک آتے منہ توڑ ورندی تننگ کیک۔ وزیراعظم پارے کہ مقبوضہ کشمیر اٹی بھارتی ظلم انا برخلاف نن ہر کہول آ آگاہی مہم چلیفینن ۔
داحالیت آتیٹی پاکستان خاموش سلنگ کپک۔ ننا قومی سلامتی نا ادارہ غاک پاکستان نا سیم و پاکستان نا تہہ ٹی سخت گام گیج چست کننگ اٹی حق آٹی ءُ، ریاست نا رکھ اتون اوار اوار سیم آتا تہہ نا زند ءِ رکھوک جوڑ کننگ اوفتا زمہ واری ءِ۔ وزیراعظم پارے کہ ہر مکتبہ فکر، عقیدہ ، رنگ و نسل نا خلقت آتے کن پاکستان ءِ رکھوک گل زمین اس جوڑ کننگ ننا مشن ءِ ۔
دا مچ آ قوم ، سیاسی جماعت آتا مشن ءِ و دا قائد اعظم نا وژن ءِ۔ وزیراعظم پارے کہ پاکستان نا انٹیلی جنس ادارہ غاک دے و نن خواری کرسا دہشت گردیءِ بے سہب جوڑ کننگ اٹی اختہ ءُ۔ اودہشت گردی نا سد آ ڈٹ آتے بے سہب جوڑ کریر۔ دہشت گرد آتا براہ راست ہدف پاکستان نا اساس ءِ۔ سلہہ بند فوج آن لس شاری تسکان ہر پاکستانی ، قوم انا د ادژمن تا ہدف ئس۔ اوپارے کہ ننا ادارہ غاک تینا کاریم ءِ کننگ ءُ داسا نا پاکستان کیہی زیات رکھوک و توانا ءِ۔ وزیراعظم محمد نواز شریف پارے کہ او اسہ وار ولدا دا پاننگ خواہک کہ پاکستان نا حکومت ، پاکستان نا الس ، سلہہ بند فوج ، قومی سلامتی نا ادارہ غاک دہشت گردی نا برخلاف جنگ اٹی یکجاءُ و یکجا سلرہ۔
