اسلام آباد(پاکستان نیوزپوائنٹ 19مئ2017ء) وزیراعظم نا سلاہکار قومی تاریخ و ادبی میرات عرفان صدیقی پارینے کہ بے نظیر انکم سپورٹ پروگرام (بی آئی ایس پی) نیزگاری نا چٹفنگ و حقدار خاہوت آتا امداد اٹی اہم کڑد ادا کننگ ءِ، ساڑی حکومت نا کندآن دا خیر انا کاریم کن وسیلہ غاتیٹی ودکی و اونا دنگ ءِ ودفنگ خوش آئند ءِ۔ داخیال آتا درشانی ءِ او چیئرپرسن بے نظیر انکم سپورٹ پروگرام ماروی میمن تون ہیت وگپ اٹی کرے ہراجمعہ نا دے قومی تاریخ و ادبی میرات ڈویژن اٹی اوڑتون اوڑدہی کرے۔
داوخت آ ماروی میمن تینا ادارہ نا کنڈآن نادار بندغ آتا امداد نا بابت مرتب کروک رپورٹ اس ہم عرفان صدیقی ءِ پیش کرے۔ سلاہکار وزیراعظم پارے کہ پالیسی تا تسلسل اہم قومی ہدف نا دوئی کن اسہ المی ءُ بنداوی گرج اسے، خوشی نا ہیت اسے کہ پاکستان اٹی پالیسی تا تسلسل نا افادیت نا بابت سیاسی جماعت آتیٹی پختگی ودی مسنے، بے نظیر انکم سپورٹ پروگرام اٹی دانا اسہ جوان ءُ مثال اسے۔
مسلم لیگ (ن) نا حکومت دا جوان انگا کاریم ءِ نئے بیرہ جاری تخانے بلکن دانا وسیلہ غاتیٹی ہم خاطر خواہ ودکی کرینے و داعمل نا شفافیت ءِ المی جوڑ کرسا دانا دنگ ءِ پین حقدار خاہوت آتسکان تالان کرینے۔ تعلیم و جان جوڑی نا پلو آتے اوار کننگ آن داپروگرام نا افادیت اٹی ودکی مسنے۔ عرفان صدیقی بی آئی ایس پی نا کنڈآن تیار کروک خصوصی رپورٹ نا تیاری و 18 پاکستانی ہندی زبان تیٹی دانا ترجمہ اوار کننگ نا کوشست ناستاءِ کرے۔
ماروی میمن پارے کہ وزیراعظم نواز شریف نا سروکی ٹی بے نظیر انکم سپورٹ پروگرام راجی گچینی نا بابت جہانی ساکھ انا حامل مثالی ءُ پروگرام اس جوڑ مسنے۔ ننا کوشست ءِ کہ مچ آ ملک اٹی ہر حقدار و نادار خاہوت اسکان سرمرے و اودے پروگرام اٹی اوار کے۔ اوپروگرام اٹی سد درسد شفافیت اتنگ کن پوسکن آ مشینی گام گیج آتا سرجم اس پارے۔
