کوئٹہ (پاکستان نیوز پوائنٹ 09 اگست2016ء) وزیراعلیٰ پنجاب محمد شہباز شریف تدوک آ کوئٹہ غا سرمس ۔ اونا دورہ نا مسخت سانحہ کوئٹہ غا پنجاب نا الس و حکومت نا کنڈآن بلوچستان نا الس و حکومت تون یکجہتی نا درشانی ئس، وزیراعلیٰ پنجاب وزیراعلیٰ سیکرٹریٹ اٹی وزیراعلیٰ بلوچستان نواب ثناء اللہ خان زہری تون اوڑدہی کرے۔ اوڑدہی نا وخت آ ہیت وگپ کرسا وزیراعلیٰ پنجاب پارے کہ داوخت کل قوم بلوچستان نا حکومت و الس تون سلوک ءِ و سانحہ کوئٹہ غا است ہسون ءِ ، ننا غٹ تر ہمدردیک پدسلوک آ خاہوت آتون ءُ ہرافتا دوست آک بھاز بھلو قربانی اس تسنو۔
اوپارے کہ دہشت گرد آک بدترین دہشت گردی و بربریت نا درشانی ءِ کرینو ہرانا اخس کہ مذمت ءِ کننگے کم ءِ۔ وزیراعلیٰ پنجاب پارے کہ نن غٹ اسہ جون اسینا وڑاُن دنکہ جون نا اسہ جاگہ اسے ٹی تکلیف مریک تو مچ آ جون اودے محسوس کیک ہنداوڑ اگہ اسہ صوبہ اسے ٹی دہشت گردی نا واقعہ اس مریک تو اونا دڑدءِ غٹ ملک و کل و قوم محسوس کیک۔ اوپارے کہ داڑے بننگ نا مسخت ایلمی و یکجہتی نا کلہو ءِ تروئی ءِ و دہشت گرد آتا پاروئی ءِ کہ نن بحیثیت اسہ قوم اوفتا برخلاف یکجااُن و اوفتا ناپاک عزم آک وخت اس ہم سرسہب مفسہ۔
داوخت آ ہیت وگپ کرسا وزیراعلیٰ بلوچستان نواب ثناء اللہ خان زہری پارے کہ بلوچستان نا الس ہمیش ملک اکن قربانی تسنو و پین وخت اس ہم ایترہ۔ بلوچستان نا الس پاکستان تون تفوک ءِ و ہمیش سلک۔ ہراوخت اسکان دہشت گردی چٹپک ننا جنگ برجاء سلک۔ بلوچستان نا الس ءِ اسہ پرامن و خوانوک ءُ پاکستان اس درکار ءِ ۔ اوپارے کہ دہشت گرد آک چنا، طالب علم ، وکیل ، ڈاکٹر و لس الس ءِ نشانہ جوڑ کیرہ ، دہشت گردی نا کمک اٹ ملک انا بنداو ءِ خورک کروک آ ک ننا غٹ انا اسیجا دژمن ءُ ، اوفتا برخلاف جنگ اٹی سیاست دان ، عالم دین، راجی و قبائلی سرکڑدہ و مکتبہ فکر آن تعلق تخوک آ بندغ آتے تینا بشخ ءِ شاغوئی مریک۔
صوبائی وزراء میر سرفرازبگٹی ، عبدالرحیم زیارتوال ، شیخ جعفر خان مندوخیل و چیف سیکرٹری بلوچستان سیف اللہ چٹھہ وزیراعلیٰ پنجاب نا بننگ آ اونا منت واری ءِ ادا کریر۔ وزیراعلیٰ پنجاب سول ہسپتال بمب دھماکہ نا جاست وپاست کن حکومت پنجاب نا کنڈآن ہروڑکمکاری نا باوری ترفے وخت اس کہ او بمب دھماکہ نا شہید آتا خاہوت و ٹھپی مروک آتے کن ہفت ءُ نیم کروڑ روپئی امداد رقم نا چیک اس ہم وزیراعلیٰ بلوچستان ءِ پیش کرے۔
داکان مست وزیراعلیٰ پنجاب محمد شہباز شریف گونڈءُ دورہ اسے آ سرمس تو کوئٹہ بالی پٹ آ وزیراعلیٰ بلوچستان نواب ثناء اللہ خان زہری ، صوبائی وزراء، چیف سیکرٹری بلوچستان و ایلو کمامدارآک اودے بخیر کریر۔ پنجاب نا صوبائی وزیر رانا مشہود و ایلو کمامدارآک ہم وزیراعلیٰ پنجاب تون اوار ئسر۔
