کوئٹہ (پاکستان نیوز پوائنٹ 09 اگست2016ء) بلوچستان نا سیاسی و مذہبی راہشونک کوئٹہ ٹی خودکش جلہو نا مذمت ءِ کرسا الس آن خواست کرینو کہ او دہشت گرد آتا ہندا عزم ءِ بے سہب جوڑ کننگ کن اتحاد و یکجہتی وسیوت و سخا و ایلمی نا دودربیدہ ءِ مون آ دیر، وکلا برادری و صحافی تا خون اٹی اوار عنصر آک رعایت نا حقدار افس حکومت دہشت گرد آتا برخلاف دمدستی وڑاٹ کاررروائی کرسا امن نا اڈتنگ کن سخت گام گیج چست کے۔
داخیال آتا درشانی ءِ ترجمان حکومت بلوچستان انوارالحق کاکڑ، جمعیت علماء اسلام نا باسک قومی اسمبلی مولانا امیر زمان ، پاکستان مسلم لیگ (ن) نا سینیٹر سردار محمد یعقوب خان ناصر، جماعت اسلامی بلوچستان نا امیر مولانا عبدالحق ہاشمی سے شنبے آ ”اے پی پی“ تون ہیت وگپ کرسا کریر۔ ترجمان حکومت بلوچستان انوارالحق کاکڑ پارے کہ بلال انور کاسی ایڈووکیٹ نا خون و سول ہسپتال کوئٹہ ٹی دھماکہ نابلوچستان غٹ پوریاگر وکلاء، سول سوسائٹی و مذہبی و سیاسی راہشونک ترندانگا لوز آتیٹی مذمت کرسا دہشت گرد آتے صفا کلہو تسر کہ امن اکن صوبہ نا غٹ تپہ غاک یکجاءُ۔
اوپارے کہ اسلام تون اوار ہچ ءُ مذہب اس بے گناہ انسان تا خون ءِ کننگ نا موکل تفک۔ کوئٹہ تون اوار مچ آ بلوچستان اٹی پاک فوج ، پولیس ، فرنٹیئر کور و کانود نافذ کروک آ ادارہ غاتا کارندہ غاتا سرسہب آپریشن ناسوب دہشت گرد آک آسان ہدف آتے نشانہ جوڑ کننگ ءُ ولے بلوچستان حکومت دہشت گرد آتا برخلاف بے پرخ و پورو واک اتون کومبنگ آپریشن نا بناءِ کرینو و بلوچستان اٹی بحالی امن کن غٹ گام گیج آتے کاریم اٹ ہتسا ہروڑنا قربانی تننگک۔
جمعیت علماء اسلام بلوچستان نا نائب امیر باسک قومی اسمبلی مولانا امیر زمان پارے کہ اسہ بے گناہ انسان اسے نا خون پورو انسانیت نا خون ءِ کننگ نا بریبر ءِ۔ اسلام بے گناہ جان تا خون نا ہرگز موکل تفک۔ اوپارے کہ الس آن خواست کینہ کہ او دہشت گردآتا ہندا عزم ءِ بے سہب جوڑ کننگ کن اتحاد و یکجہتی و ایلمی نا دودوربیدہ ءِ مون آ دیر ۔ وکلاء برادری و صحافی تا خون اٹی اوار عنصر آک ہچ ءُ رعایت اسے نا حقدار افس۔
حکومت دہشت گرد آتا برخلاف دمدستی وڑاٹ کارروائی کرسا امن نا اڈتننگ کن سخت گام گیج چست کے۔ مولانا امیر زمان سانحہ کوئٹہ ٹی شہید مروک آ بندغ آتا خاہوت آتون ہمدردی نادرشانی و ٹھپی تا زوت جان جوڑی کن دعا کرینے۔ پاکستان مسلم لیگ (ن) نا بنجائی سینئر نائب صدر سینیٹر سردار یعقوب خان ناصر سانحہ کوئٹہ ٹی شہید مروک آ بندغ آتا خاہوت آتون ہڑزخواہی و ہمدردی نا درشانی ءِ کرسا پارے کہ وزیراعظم پاکستان محمد نواز شریف و آرمی چیف جنرل راحیل شریف نا سانحہ کوئٹہ آن گڈ غٹ اختہ غاتے منسوخ کرسا کوئٹہ غا بننگ و ٹھپی تا جان پڑسی و امن و ایمنی نا بابت بڑزکو کہول دیوان اٹی شرکت آن الس و پوریاگرتے پوسکن ءُ حوصلہ اس ملانے۔
سینیٹر سردار یعقوب خان ناصر پارے کہ نیشنل ایکشن پلان و آپریشن ضرب عضب آن گڈ داسا دہشت گردآتا برخلاف کومبنگ آپریشن نا بناء خوش آئند گام اسے ۔ جماعت اسلامی بلوچستان نا امیر مولانا عبدالحق ہاشمی پارے کہ بلال انور کاسی ایڈووکیٹ نا شہیدی و خود کش دھماکہ ٹی بے گناہ قیمتی جان تا شہیدی نا باوجود کوئٹہ نا الس صبر انا دامن ءِ ہلکر۔ کوئٹہ تون اوار مچ آ بلوچستان اٹی ناخوشگوار واقعہ پیش بتو ہرادہشت گردآتا ناکامی و الس نا کٹنگ نا نشانی ءِ۔
اوپارے کہ حکومت غٹ سیاسی جماعت آتے اسہ وار ولدا پٹ اٹی ہلسا نیشنل ایکشن پلان آ پبی انداز اٹ عملدرآمد کرفے تانکہ بلوچستان تو ن اوار مچ آ ملک آن دہشت گردی نا ناسور ءِ چٹفنگ مرے۔ مولانا عبدالحق ہاشمی پارے کہ عالم دین و مذہبی جماعت آک سانحہ کوئٹہ نا پبی وڑاٹ مذمت ءِ کرسا حکومت و کانود نافذ کروک آادارہ غاتے تینا پورو کمکاری نا باوری ترفینو۔
