اسلام آباد (پاکستان نیوز پوائنٹ 09 اگست2016ء) وزیراعظم محمد نواز شریف پارینے کہ مقبوضہ کشمیر اٹی جبر و استبداد نا گواچی کشمیری تا توار جوڑ مننگ اونا فرض ءِ ، دنیا ءِ کشمیری الس نا حالیت زار و رَوا جہد آن آگاہ کننگ کن ہر حد اسکان کاوہ۔ اوداہیت ءِ سے شنبے آ وزیراعظم ہاؤس اٹی اقوام متحدہ جنرل اسمبلی نا بارواٹی تیاری دیوان نا کماشی ءِ کرسا پارے۔
اوپارے کہ مقبوضہ کشمیر اٹی کشمیری تا حق خودارادیت نا نفی اقوام متحدہ نا پدریسہ بے سہبی تیان اسٹ ءِ ۔ وزیراعظم پارے کہ حق خودارادیت کشمیری تا بنداوی حق ءِ ۔ او اوفتا مسخت نا دوئی کن مقبوضہ کشمیر اٹی کشمیری تا مخ تفی کن ہرکوشست ءِ کاریم اٹ ہتیک۔ وزیراعظم نا سلاہلار خارجہ امور سرتاج عزیز ، وزیراعظم نا خصوصی کمکار طارق فاطمی ، خارجہ سیکرٹری اعزاز احمد چوہدری ، اقوام متحدہ ٹی پاکستان نا آخبتی مندوب ڈاکٹر ملیحہ لودھی ، امریکہ ٹی پاکستان نا سفیر جلیل عباس جیلانی و ایلو سینئر کمامدارآک دیوان اٹی شرکت کریر۔
دیوان اٹی اقوام متحدہ نا جنرل اسمبلی نا بروک آ دیوان اٹی اوار کروک آ ایجنڈہ غا غور کننگا ہراٹی وزیراعظم نا شرکت متوقع ءِ۔ دیوان اٹی داہیت آ زورشاغنگاکہ کشمیر پدریسہ اقوام متحدہ نا بے پورو ایجنڈہ ءِ ہنداخاطران بھارت ءِ احساس مرے کہ کشمیر اونا داخلی آخا بلکن علاقائی و بین الاقوامی گڑتی نا معاملہ ءِ۔
