اسلام آباد (پاکستان نیوز پوائنٹ 09 اگست2016ء) بنجائی وزیر قومی جان جوڑی سائرہ افضل تارڑ پارینے کہ پی ٹی آئی کشمیر آن کراچی اسکان ہر الیکشن ءِ کٹفسا بسنے، دھاندلی نا رٹ ءِ خلنگ پی ٹی آئی وطیرہ جوڑ مسنے ، دھرنہ و برانز ملکی شون اٹی بھلو اڑاند اسے۔ سے شنبے آ داڑے جاری بیان اٹی اوپارے کہ عمران خان و پی ٹی آئی انتس کہ کننگ ءِ اسہ ہم محب وطن اس داوڑنا سیاست کپک، الس دا دھرنہ و برانز نا سیاست آن تنگ بسنے ، خلقت آتے برانزی ریلی تیان بیدس ملکی شون دوست ءِ۔
میاں نواز شریف ہر وار کوشست کننگ ءِ کہ ملک اٹی شون مرے، معاشی حالیت آک سوگو مریرو امن مرے ، الس شونہال مرے۔ میاں نواز شریف نا سروکی ٹی معیشت نا پہیہ سوگو مسنے و ریل انا پہیہ ہم چلینگ انگ ءِ ۔ ملکی حالیت آک پین گچینی نا کنڈروان ءُ ، تعلیم و جان جوڑی نا ٹک آک ہم گچین مننگ ءُ۔ اوپارے کہ 2018 ء نا گچین کاری تیٹی ہم انشاء اللہ مسلم لیگ ن سرسہبی دوئی کیک۔
وزیر قومی جان جوڑی پارے کہ پانامہ لیکس معاملہ آن بابت ٹی او آرز طے کننگ نا معاملہ ءِ ہم زوت ایسر کننگک۔ ٹی او آرز اکن کمیٹی ٹی اوار اپوزیشن نا گڑاس باسک آک تینا پارٹی آن ایڑ تر مرسا پین جاگہ سے آن ڈکٹیشن ہلنگ ءُ۔ سائرہ افضل تارڑ پارینے کہ کنا باوہ میاں افضل حسین تارڑ حافظ آباد نا یونین کونسل نمبر 8 کولوتارڑآن سرسہبی دوئی کریسس، پی ٹی آئی سیالکوٹ نا جلسہ ٹی داڑآہم دھاندلی نا دوبہ ءِ خلک۔
سپریم کورٹ دا دوبہ غاتے رد کرسا میاں افضل تارڑ ءِ چیئرمین یونین کونسل 8 کولوتارڑ حافظ آباد آ بحال کرینے۔ اوپارے کہ دھرنہ والاتے ہراصوبہ ٹی مینڈیٹ ملانے اوفتے مرے کہ برانز آن بیدس صوبہ ٹی ہم گڑاس کاریم کیر۔ عمران خان پہہ مسنے کہ او خیبر پختونخوا ٹی ہم تینا ہیبدار کارکڑد نا سوب بروک آ گچین کاری تیٹی سرسہبی دوئی کننگ کپک و ہندا پی ٹی آئی نا بوکھلائٹ نا اصل سبب ءِ۔
