کوئٹہ (پاکستان نیوز پوائنٹ 08 اگست 2016ء) وزیراعظم محمد نواز شریف ریاست نا غٹ سیکورٹی ادارہ غاتے پارت کرینے کہ او دہشت گرد آتا چٹفنگ کن پورو واک اتون کارروائی کیر، دہشت گردآک آسان ہدف آتے نشانہ جوڑ کننگ ءُ ہرافتا پوسکنا سخت وڑوڈول اٹ ورندی ءِ تروئی مرے۔ او دوشنبے آ گورنر سیکرٹریٹ کوئٹہ ٹی اسہ ہڑدڑی دیوان اسے نا کماشی ءِ کریکہ۔ دیوان اٹی وزیراعظم ءِ سول ہسپتال اٹی دہشت گرد جلہو آن ودی مروک آ حالیت آتابارواٹی حوال تننگا۔
دیوان اٹی چیف آف آرمی اسٹاف جنرل راحیل شریف ، گورنر بلوچستان محمد خان اچکزئی، وزیراعلیٰ بلوچستان نواب ثناء اللہ خان زہری ، کمانڈرسدرن کمانڈ لیفٹیننٹ جنرل عامر ریاض ، ڈائریکٹر جنرل آئی ایس پی آر لیفٹیننٹ جنرل عاصم سلیم باجوہ ، وزیراعظم نا سلاہکار قومی سلامتی ناصر جنجوعہ ، بنجائی وزیر اطلاعات و نشریات پرویز رشید ، ڈی جی ملٹری آپریشنز و ڈی جی ملٹری انٹیلی جنس ہم شرکت کرے۔
چیف سیکرٹری بلوچستان سیف اللہ چٹھہ وزیراعظم ءِ احوال تس۔ داوخت آ وزیراعظم محمد نواز شریف پارے کہ مسکوہی مسہ سال انا وخت بلوچستان اٹی امن نا بحالی نا چرجوئی ٹی گچینی خننگا و دا افسوزناک واقعہ قوم انا عزم ءِ متزلزل کننگ کپک۔ اوپارے کہ داٹی ہچ ءُ شق اس اف کہ پاکستان نا دژمن چین پاکستان اقتصادی راہداری نا برخلاف ءِ۔ اوپارے کہ چیف آف آرمی اسٹاف نا سروکی ٹی فوج سی پیک انا بابت مون تروک سیکورٹی نا خلیس اتون مون تننگ کن شون و شان وڑاٹ کاریم کننگ اٹی ءِ۔
اوپارے کہ بنجائی و صوبائی حکومت آک فرنٹیئر کانسٹیبلری و انسداددہشت گردی نا محکمہ سی ٹی ڈی نا کاریم نا کچ ءِ ودفنگ کن وسیلہ فراوان کیک۔ وزیراعظم محمد نواز شریف پارے کہ نن دہشت گردی نا بین الاقوامی خلیس آتا پبی کوشست اٹ خاتمہ ءِ کینہ۔ داچرجوئی ٹی بنجائی و صوبائی کانود نافذ کروک آ ادارہ و انٹیلی جنس ایجنسی تا اسہ فعال میکنزم اس جوڑ کننگک ، دا فریم ورک انا دوئی وسیلہ غاتیان کمک فراوان کینہ۔ وزیراعظم وزیراعلیٰ بلوچستان ءِ دا چرجوئی ٹی اسہ جامع رپورٹ اس پیش کننگ نا پارت کرے۔ داکان مست وزیراعظم کوئٹہ غا بننگ آ سی ایم ایچ نا دورہ ءِ کرے و دہشت گردی نا جلہو نا ٹھپی مروک آتا جان پڑسی ءِ کرے۔ او ٹھپی مروک آتا زوت جان جوڑی کن دعاہم کرے۔
