اسلام آباد (پاکستان نیوز پوائنٹ 08 اگست 2016ء) چیف آف آرمی اسٹاف جنرل راحیل شریف کوئٹہ دھماکہ ٹی ٹھپی مروک آتا جان پڑسی کن کوئٹہ نا دورہ ءِ کرے ، چیف جسٹس بلوچستان ہائی کورٹ تون ہڑزخواہی نا درشانی ءِ کرے و بڑزکو فوجی و سول کمامدارآتا دیوان نا کماشی ءِ ہم کرے۔ پاک فوج انا شعبہ تعلقات عامہ (آئی ایس پی آر) نا ڈائریکٹر جنرل لیفٹیننٹ جنرل عاصم سلیم باجوہ نا ٹوئیٹ نا رداٹ دوشنبے آ دھماکہ آن گڈ آرمی چیف جنرل راحیل شریف کوئٹہ غا سرمس۔
آرمی چیف کوئٹہ نا دورہ نا وخت آ بلوچستان ہائی کورٹ نا دورہ ءِ ہم کرے۔ چیف جسٹس و بلوچستان ہائیکورٹ نا ایلو جج صاحب آتون ہڑزخواہی نا درشانی ءِ کرے۔ اوکان گڈ آرمی چیف سول ہسپتال کوئٹہ نا دورہ ءِ کرے ہراڑے ٹھپی مروک آتون یکجہتی نا درشانی ءِ کرے و پارت تس کہ بھاز ٹھپی مروک آتے سی ایم ایچ آ گدریفنگے۔ آرمی چیف کوئٹہ ٹی بڑزکو فوجی و سول سیکورٹی کمامدارآتا بڑزکو کہول نا دیوان نا کماشی ءِ ہم کرے۔ دھماکہ ٹی بھاز ٹھپی اِرا بندغ ءِ سی ایم ایچ کراچی آ گدریفنگا وخت اس کہ ایلو 20 آن زیات ٹھپی تے آرمی نا جہاز انا کمک اٹ ملک انا جتا ہسپتال آتیٹی گدریفنگ انگ ءِ۔
