بھارت نا کنڈآن پاکستان اٹی دہشت گردی و مخ تفی و ریاستی سرپرستی پورو وڑاٹ بے نقاب مسنے دفتر خارجہ نا ترجمان نفیس ذکریا نا ہفتہ وار پریس بریفنگ

بھارت نا کنڈآن پاکستان اٹی دہشت گردی و مخ تفی و ریاستی سرپرستی پورو وڑاٹ بے نقاب مسنے دفتر خارجہ نا ترجمان نفیس ذکریا نا ہفتہ وار پریس بریفنگ

اسلام آباد(پاکستان نیوز پوائنٹ 27اپریل2017ء) دفترخارجہ پارینے کہ بھارت نا کنڈآن پاکستان اٹی دہشت گردی نا مخ تفی و ریاستی سرپرستی پورو وڑاٹ بے نقاب مسنے، جہانی برادری بھارت نا تخریبی و دہشت گردی نا سرجزآتا نوٹس ءِ ہلے، تحریک طالبان پاکستان نا مسکوہی ترجمان احسان اللہ احسان و بھارتی اودیم ایجنسی ’را‘ نا ایجنٹ کلبھوشن یادیو نا پاکستان اٹی دہشت گردی نا اعترافی بیان و ساڑی ہی ٹی اوغانستان اٹی مدر آف آل بمب انا دھماکہ ٹی 13راایجنٹ آتا تپاخت بھارت نا برخلاف ناقابل تردید شاہدی اسے۔

دفترخارجہ نا ترجمان نفیس ذکریا پنچ شنبے نا دے ہفتہ وار پریس بریفنگ اٹی ٹی ٹی پی نا مسکوہی ترجمان نا بابت اسہ سوج اسے نا ورندی ءِ ترسا پارے کہ احسان اللہ احسان نا کیس کلبھوشن یادیو آن جتاءِ، ٹی ٹی پی نا مسکوہی ترجمان رضاکارانہ وڑاٹ تینے سیکورٹی فورس آتا حوالہ کرے و اوہم اوغانستان اٹی بھارتی را ایجنٹ آتا ساڑی گری ، دہشت گردآتا سرپرستی و اوغان گل زمین پاکستان نا برخلاف کاریم اٹ اتنگ نا اعتراف ءِ کرینے۔

ترجمان پارے کہ ساڑی ہی ٹی اوغانستان اٹی مدرآف آل بمب انا دھماکہ ٹی 13بھارتی را ایجنٹ آتا تپاخت ہم ڈیہہ خاص کر پاکستان اٹی بھارت نا تخریبی و دہشت گردی نا سرجزآتیٹی اوار مننگ نا ناقابل تردید شاہدی اسے۔ اوپارے کہ کلبھوشن یادیو بھارتی اودیم ایجنسی رااکن کاریم کرسا رنگی آ دوتے اٹ ہلنگا و او تینا غٹ ڈوہ تا اعتراف ءِ کرینے، ملک انا غٹ کانودی گرج آتے مون آتخسا عدالت اودے سزا بنفینے ۔

کلبھوشن یادیو ءِ قونصلر رسینگ نا بابت سوج آ ترجمان پارے کہ دا بابت فیصلہ میرٹ آ کننگک۔ ترجمان پارے کہ بھارت نا پاکستان اٹی دہشت گردی نا مخ تفی و سرپرستی ثابت مسنے وخت اس کہ ٹی ٹی پی نا مسکوہی ترجمان پین شاہدی فراوان کرینے۔ احسان اللہ احسان اعترافی بیان اٹی دا ہم پارے کہ ہراتم جماعت الحرار نا راہشون اسہ جلہو اسے ٹی ٹھپی مس تو اونا درمان بھارت اٹی کننگا۔

دفترخارجہ نا ترجمان بھارت اٹی اقلیت خاص کر مسلمان آتون ناروا سلوک و مذہبی تہوار تیا پابندی آ گڑتی نا درشانی ءِ کرسا جہانی برادری آن خواست کرے کہ او بھارت اٹی اقلیت آتیا بیدادی نا نوٹس ءِ ہلے۔ ترجمان پارے کہ بھارتی گام گیج مذہبی ہم آہنگی نا سراسر منافی ءِ۔ ترجمان پارے کہ بھارت دہشت گردی کن نئے بیرہ پاکستان اٹی جاسوس گدریفنگ ءِ بلکن پاکستان ءِ نزور کننگ کن اوغان گل زمین ءِ ہم کاریم اٹ اتنگ ءِ۔

احسان اللہ احسان تینا انکشا ف آتیٹی دا ہیت انا اعتراف ءِ کرینے کہ جماعت الاحرار پاکستان ءِ نزور کننگ کن بھارت نا ایجنڈاآ کاریم کننگ ءِ۔ نفیس ذکریا پارے کہ جہانی برادری ءِ بھارت نا تخریبی و دہشت گردی نا سرجز آتا بایدے نوٹس ءِ ہلے۔ مقبوضہ کشمیر اٹی بھارتی بربریت و راجی ذرائع ابلاغ آ پابندی آ است ہسونی نا درشانی ءِ کرسا ترجما ن پارے کہ جہانی برادری خاص کر اقوام متحدہ بھارت ءِ مقبوضہ وادی نا بے گناہ الس آ ظلم و بیداد آن تورے۔

اسلامی فوجی سیوت نا بابت اسہ سوج اسے نا ورندی ءِ ترسا ترجمان اسہ وار ولدا صفا کرے کہ دا الائنس اسہ ملک اسے نا ہم برخلاف اف۔ کرنل (ر) حبیب ظاہر نا گمشدگی نا بابت اسہ سوج اسے نا ورندی ءِ ترسا ترجمان پارے کہ کھٹمنڈو ٹی ننا مشن دا معاملہ نا خڑک آن جاچ ءِ ہلنگ ءِ، اودے نوکری نا آسرا ترسا اختہ کننگا۔ اوپارے کہ کرنل (ر) حبیب ظاہر نا گمشدگی ٹی بھارت نا کڑد ءِ گوجالنگ مفک۔