اسلام آباد(پاکستان نیوز پوائنٹ 21اپریل2017ء) وزیر مملکت دیر و بجلی عابد شیرعلی پارینے کہ عدالتی فیصلہ غاتے امنا کپننگ پیپلزپارٹی نا وطیرہ ءِ۔ جوائنٹ انویسٹی گیشن ٹیم ءِ منپننگ نا پیپلزپارٹی نا پڑو پوسکنءُ ہیت اس اف۔ انکوائری کمیٹی آصف علی زرداری ، ایان و شرجیل میمن نا بارواٹی جوڑ کننگے۔ اوجمعہ نا دے پارلیمنٹ ہاؤس ناپیشن میڈیا تون ہیت وگپ کرسا پارے کہ عدالت اسہ وار ولدا نواز شریف ءِ بری الزمہ گوندانے۔
پاناما پیپر نا ہیت ءِ کروک آک محض توڑ پھوڑ، دھرنہ و برانز نا سیاست ءِ مون آ درسا تینا است ءِ پدین کننگ خوائرہ۔ اسہ سوج اسے نا ورندی ٹی اوپارے کہ پیپلزپارٹی نا تاریخ گواہ ءِ کہ او وخت اس ہم عدالتی فیصلہ غاتے امنا کتنے و داسہ جے آئی ٹی نا مخالفت ءِ کرسا تینا روایت ءِ برقرار تخانے۔
