کوئٹہ (پاکستان نیوز پوائنٹ 06 اگست 2016ء) صدر ءِ مملکت ممنون حسین ءَ گوشت کہ اَستیں حکومت ءِ جونیں ءُُ سانائیں زرکاری پالیسی آنی سبب ءَ پاکستانی زرکاری امبار ملکی راجدپتر ءِ اندر ءَ بُرزتریں کساس 23ارب ڈالر ءَ تاں سر بوتگ اَنت، چاگرد ءِ زانت ءُُ زانش کار حکومت ءِ جوانیں کار آنی کسہو ءَ اُلس ءِ نیام ءَ شنگ ءُُ تالان بکن اَنت ایش آوانی فرض اِنت، وتی کرد ءَ پیلو بکن اَنت۔
اے ھیالانی درشانی آئی ءَ گورنر گس کوئٹہ ءَ قبائلی رھشون ءُُ ایندگہ وزیر آنی گل ءَ گوں گپ ءُُ تران کنان ءَ گوشت اَنت۔ اے موہ ءِ سر ءَ گورنر بلوچستان محمد خان اچکزئی سر وزیر بلوچستان نواب ثناء اللہ زہری ھم ساڑی اَتاں۔ صدر ءِ مملکت ممنون حسین ءَ گوشت کہ اَستیں حکومت ءَ 2013ءِ گچین کاری ءَ 14ہزار 8سد کلدار وام میراسی ءَ رس اِت، 2013ءَ بگر داں 2016ءَ وام آنی کساس یوک ءَ 34درسد گیشی بوتگ۔
ایشی ءِ مٹ ءَ 2008ءَ چہ 2013ءَ تاں پنچ سال ءِ دوران ءَ ملکی وام آنی تہ ءَ دو سد درسد گیشی بوتگ۔ اَستیں حکومت ءَ مزن وزیر محمد نواز شریف ءِ پاگواجئی ءَ جوانیں گامگیج چست کنان ءَ سئے سال آنی تہ ءَ در ملکی وام آنی کساس 21درسد ءَ داشتگ۔ صدر ءِ مملکت ممنون حسین ءَ گوشت کہ وزارت ءِ ھزانگ پاکستان ءَ آیوکیں وھد ءَ آئی ایم ایف ءَ چہ ایچی وام نہ زورگ ءِ پیسلہ کُتگ۔
اے یک جونیں گام اِت۔ اے پیسلہ چہ ملکی معشیت مھکم بیت ۔ صدر ءِ ممنون حسین ءَ گوشت کہ پاک چین اقتصادی راہداری ءَ چہ پاکستان ءِ واستہ قدرت ءِ نیمگ ءَ یک انچیں نعمت اِت کہ ایشی ءِ سر ءَ مارا مزن پھناتیں ھُدا ے شُگر گرگی اِنتءُُ ایشی ءَ چہ بھرہ مند بوھگ ءِ واستہ سک باز جُھد ءُُ کوست کنگی اِنت۔ آئی ءَ گوشت کہ سی پیک ءِ روبرکتی دگ ءِ تہ ءَ اِچ مٹ ءُُ بدلی کنگ نہ بوتگءُُ ایشی ءِ بابت ءَ شنگ کتگیں توامیں اپواہ دروگ ءُُ بٹاک اَنت۔
آئی ءَ گوشت کہ ملک دیمروئی ءِ نیمگ ءَ گام جنگ ءَ اِنت، دو سال آنی تہ ءَ پاکستان انچیں کشکے ءَ راھ کپیت کہ ما ھمائی یے واھشت ءَ کن آں۔ صدر ءِ مملکت ءَ ساڑیگ ایں مردم آناں زور پر دات کہ آ اُلسی سیت ءِ توامیں گامگیج آناں اُلس ءِ دیم ءَ کسہو ءَ بکن اَنت ءُُ راستیں ھساب ءُُ کتاب ءِ گوما حکومت ءِ کرد ءَ را پیش بکن اَنت ، تانکہ گامگیج آنی حوصلہ اقزائی بہ بیت ءُُ رچ جاڑی دارگ بہ بیت۔
