اسلام آباد(پاکستان نیوز پوائنٹ 17اپریل2017ء) ملک اٹی قومی خانہ و مردم شماری نا ارٹ میکو مرحلہ نا بناء 25 اپریل آن مریک۔ محکمہ شماریات نا شیڈول نا رداٹ مردم و خانہ شماری ناارٹ میکو مرحلہ ٹی اولیکو بلاک کن خانہ شماری نا کاریم 25آن 27 اپریل اسکان پورو مریک وخت اس کہ مردم شماری 28 اپریل آ بناء کیک ہرا 8 مئی آ پورو مریک۔ ارٹ میکو مرحلہ ٹی ارٹ میکو بلاک کن خانہ شماری 11مئی آن 13مئی اسکان مریک وخت اس کہ مردم شماری 14 مئی آن 24مئی اسکان کننگک۔
اولیکو مرحلہ ٹی 63 ضلع غاتیٹی مردم و خانہ شماری پورو مسنے ۔ دافتے ٹی پنجاب نا 16 ، سندھ انا 8 ، خیبر پختونخوانا 13، بلوچستان نا 15، آزاد جموں و کشمیر نا 5و گلگت بلتستان نا 5 ضلع غاتیان بیدس اورکزئی ایجنسی ہم اوار ءِ ۔ ارٹ میکو مرحلہ ٹی ملک انا 88 ضلع غاتیٹی خانہ و مردم شماری مریک ہرافتے ٹی پنجاب و سندھ انا بیست ءُ یک بیست ءُ یک، خیبر پختونخوا نا 18، بلوچستان نا 17، کشمیر و گلگت بلتستان نا پنچ پنچ ضلع و بنجائی دارالحکومت اسلام آباد اوار ءِ۔
قطبی و سویلی وزیرستان ایجنسی تیان بیدس بنجاء نا بست و بند اٹی ایلو غٹ قبائلی علاقہ غاتیٹی ہم شش میکو قومی خانہ و مردم شماری نا عمل معمول نا رداٹ بناء کیک۔ قبائلی علاقہ غاتیٹی فاٹا ڈویلپمنٹ اتھارٹی نا کمک اٹ حساب وکتاب جمع کننگ نا کاریم ءِ کننگک۔ 15 مارچ آن بناء کروک آ اولیکو مرحلہ سرسہبی اٹ پورو کننگانے و داٹی مسہ دے خانہ شماری ، دہ دے مردم شماری و اوکان پد اسہ دے اس آرام و اِرادے ریکارڈ جمع کرفنگ کن جتا کننگاسس۔
مردم و خانہ شماری کروک آ ٹیم تیٹی سول ادارہ غاتون اوار اوار کانود نافذ کروک آ ادارہ و سلہہ بند فوج اناکارندہ غاک فرض سرانجام تسر۔ اولیکو مرحلہ ٹی ملک انا 63 ضلع غاتیٹی کاریم پورو کننگانے ہرافتے ٹی غٹ صوبائی دارالحکومت ہم اوار ءِ و کم و ود ملک انا نیمہ آبادی نا حساب وکتاب دوئی کننگانے و داسہ ڈیٹا فارم تا پدی ناعمل ہم بناء کرینے۔ ملک اٹی مردم شماری ناعمل ناشفافیت ناجاچءِ ہلنگ کن جہانی مبصرآتا 6ٹیم پاکستان آ بسرہرا تینا رپورٹ ءِ تیار کننگ ءُ۔
