اسلام آباد(پاکستان نیوز پوائنٹ 05 اگست 2016ء) وزیراعظم محمد نواز شریف پارینے کہ ساڑی آ حکومت نا اسلوب حکمرانی نا وژن شفافیت و مستعدی آ مبنی ءِ ، داہڑتوم آ اجزاء تیا ہچ ءُ سمجھوتہ اس مفک۔ داہیت ءِ او جمعہ آ وزیراعظم ہاؤس اٹی نیشنل ہائی وے اتھارٹی نا کنڈآن تروک آ بریفنگ نا وخت آ پارے۔ چیئرمین این ایچ اے شاہد اشرف تارڑ مچ آ ملک اٹی و بروک آ شونداری ڈٹ آتا بارواٹی جامع بریفنگ تس۔
وزیراعظم نواز شریف حیدرآباد سکھر موٹروے نا جوڑ جاڑ نا اصولی منظوری ءِ تس و چیئرمین این ایچ اے ءِ پارت کرے کہ مارچ 2017 ء ٹی ڈٹ آ کاریم نا بناءِ کننگے۔ وزیراعظم اگست نا آخری ہفتہ ٹی سیالکوٹ لاہور موٹروے ڈٹ انا افتتاح ءِ کیک۔ وزیراعظم ءِ پاننگاکہ سی پیک ڈٹ جاٹ تون اوار اسہ ہزار ارب روپئی مالیت نا بنداوی ڈھانچہ نا شون نا ڈٹ آک جاری ءُ۔
اوفتے آن گیشتر ڈٹ 2017ء نا آخر و مارچ 2018 ء نا نیام اٹ پورو مریرہ۔ وزیراعظم ءِ پاننگاکہ موٹروے ڈٹ آتیا عملدرآمد کرسا بے کچ شفافیت ءِ باوری جوڑ کننگانے۔ وزیراعظم پارے کہ مچ آ ملک اٹی تالان مروک آ موٹروے نا جال علاقائی مواصلاتی رابطہ غاتا گام اٹی کمکارمریک۔ داڑآن مچ آ ملک اٹی شون نا عمل نا رفتار ترند مریک، اقتصادی سرجزآتیٹی ودکی مریک و روزگار نا وارخواہی ودی مریک۔ وزیراعظم پارے کہ بروک آ سال آتیٹی ننا مخلصانہ و سخت کوشست آتیان اسہ شون پسند و شون ہلوک پاکستان ءِ خننگ آ ملک۔
