اسلام آباد(پاکستان نیوز پوائنٹ 05 اگست 2016ء) وزیراعظم محمد نواز شریف اومیت ظاہر کرینے کہ پوسکن گچین مروک آ وزیراعلیٰ سندھ سید مراد علی شاہ صوبہ نا الس نا است خواہی و مینڈیٹ نا رداٹ صوبہ نا شون و گچینی کن کوشست کیک، بنجائی حکومت سندھ انا الس نا گچین وڑاٹ خذمت کن اونا کوشست آتیٹی صوبائی حکومت ءِ پبی کمکاری فراوان کرسا کیک۔ اوداہیت ءِ وزیراعلیٰ سندھ سید مراد علی شاہ تون ہیت وگپ کرسا پارے ہرا جمعہ آ وزیراعظم ہاؤس اٹی اوڑتون اوڑدہی کرے۔
وزیراعظم مرادعلی شاہ ءِ وزیراعلیٰ سندھ گچین مننگ آ مبارکبادی تس ، وزیراعلیٰ وزیراعظم محمد نواز شریف نا جان جوڑی نا بارواٹی ہریفے و سندھ آن بابت جتا معاملہ و ویل آتیا درشانِ خیال کرے۔ صوبہ ٹی جمی حالیت و کراچی ٹی امن وایمنی نا حالیت آ ہم ہیت و گپ مس۔ وزیراعلیٰ سندھ پارے کہ ننے وزیراعظم نا کنڈآن ہمیش مخ تفی ملانے و اومیت کینہ کہ ننے وزیراعظم و بنجائی حکومت نا کنڈآن دا کمکاری آخبت اٹی ملسا کیک۔
سید مراد علی شاہ تھر کول ڈٹ آ وزیراعظم نا پبی مخ تفی نا ستاءِ کرسا پارے کہ دا اونا ذاتی است خواہی نا سوب آن ءِ کہ ڈٹ شروع مس و نن دارداٹ پدریسہ کمکاری نا خواہندار اُن۔ وزیراعلیٰ پاک چین اقتصادی راہداری ڈٹ آ عملدرآمد نا بابت صوبائی حکومت نا پورو مخ تفی نا باوری ترفے۔ سید مراد علی شاہ گڑاس ڈٹ آتے سی پیک اٹی اوار کننگ نا تجویز پیش کرے ہرانا ورندی ٹی وزیراعظم پارے کہ بنجائی حکومت صوبائی حکومت تون تفوک ءِ و اودے باوری ترفے کہ سی پیک اٹی ڈٹ آتا اوار مننگ آ گچین وڑاٹ غور کننگک۔
سید مراد علی شاہ اوڑدہی ٹی وزارت دیر و بجلی آن بابت گڑاس معاملہ غاتے چست کرے ہراڑآ وزیراعظم وزیر و سیکرٹری دیر و بجلی ءِ وزیراعلیٰ تون اوڑدہی کننگ و معاملہ غاتے تین پہ تینی اوڑاٹ ایسر کننگ نا پارت کرے۔ وزیراعظم پارے کہ او غٹ صوبہ غاتیٹی شونداری ڈٹ آتا ترندی اٹ پوروی کن غٹ وزیراعلیٰ و صوبائی حکومت آتے دستیاب ءِ۔
