پاک چائنہ اقتصادی راہداری نا پوروی آن پاکستان ڈیہہ نا اہم انگا ملک جوڑ مریک و ہمسایہ ملک اوغانستان ، ایران و ہندوستان تون اوار مچ آ مڈل ایسٹ داڈٹ آن فائدہ ہرفنگ کیک،

کوئٹہ (پاکستان نیوز پوائنٹ 05 اگست 2016ء) صدر مملکت ممنون حسین پارینے کہ پاکستان خاص کر بلوچستان اٹی امن و ایمنی نا حالیت آک مسکوہی منہ سال آن پدریسہ گچینی نا کنڈا ہِننگ ءُ ہرافتا سہرا سیکورٹی فورسز و غٹ کانود نافذکروک ادارہ غاتون اوار اوار باشعور و باہمت الس ءِ ہم کاہک۔ بلوچستان نا غیور و محب وطن الس ثابت گامی و استقلال آن پاکستان نا برخلاف غٹ منفی پروپیگنڈہ و سازش آتے شکست تسر و اینو مچ آ دنیا ننا قوم انا دہشت گردی نا برخلاف پکا عزم و بے مثال قربانی تا معترف ءِ ۔

داخیال آتا درشانی ءِ او جمعہ آ فرسٹ بلوچستان اوپن محمد علی جناح شوٹنگ چیمپیئن شپ 2016ء نا افتتاحی دود آن تران کرسا پارے۔ صدر مملکت پارے کہ اینو ضرب عضب اسہ آپریشن اسے آن زیات اسہ قومی عزم، نظریہ و طرز ِ فکر و عمل جوڑ مسنے و امن عامہ نا بحالی پاک چین اقتصادی راہداری نا جوڑ جاڑ و پوروی و تعلیم و شون نا مون آ دننگ آن سوگو و شونہال پاکستان اسہ روشن حقیقت اسے نا وڑاٹ مون آ بننگ ءِ و بروک آ سال ہراتم جشن آجوئی ءِ اڈ تروءِ انشاء اللہ پاکستان اینو آن بھاز زیات سوگو روشن و شونہال مریک۔

صدر مملکت ممنون حسین پارے کہ 1970 ء اسکان ملک اٹی شون نا رفتار درست سلیس اوکان گڈ کرپشن و بدعنوانی نا عنصر ودنگ آن خرابیک برسا کریر و کارکڑد زہمی مرسا کرے ۔ کیہی بشخ آک کرپشن و بدعنوانی آن بھس مسر۔ بدعنوان عنصر آتا برخلاف مسکوہی ٹی راجی رویہ ہم مثبت ئس و بے ایمان خلقت آتیان کنارہ کشی کننگاکہ داسا ہم فرض شناس ایماندار و دننگا مخلص بندغ آتا است بڈی نا گرج ءِ ہرا پاکستان ءِ ہمو مزل اسکان دیر ہرانا تغ ءِ قائد و اقبال خناسر۔

ننے آن ہر بندغ دا پکا تہیہ ءِ کے کہ ننے کرپشن نا چٹفنگ کن تینا بشخ ءِ شاغوئی ءِ ہرانا گچین وڑوڈول ہندادے کہ کرپٹ و بدعنوان عنصر آتے راہ راست آ ہتنگ کن گچین وڑاٹ قائل کیر ، ایلو دروشم اٹی دننگا عنصر آتون راجی بائیکاٹ کننگے۔ اینو ہر بندغ مثبت رویہ ءِ اختیار کتو تو نن شون نا ہدف آتے دوئی کننگ کپنہ۔ صدر مملکت پارے کہ بلوچستان غیر معمولی اومیت آتا مظہر و مسکن ءِ۔

سی پیک معمولی ءُ ڈٹ اس اف بلکن دا سنچری نا ملینیم مریک ہرانا زیات فائدہ بلوچستان ءِ دوئی مریک۔ صدر ممنون حسین پارے کہ سی پیک آن بابت گمراہ کن ہیت کروک آتے داقومی ڈٹ آن بابت احتیاط اٹ کاریم ہلوئی مرے۔ سی پیک ڈٹ انا بناء ٹی چار پنچ آپشن ساڑی ئسر واہم گڈیکو وڑاٹ دافیصلہ ءِ کننگا کہ مست آن ساڑی بنداوی ڈھانچہ ءِ کاریم اٹ ہتسا اودے فعال کننگے دافیصلہ آن گڈ ہچ ءُ بدلی اس متو باوری ایتیوہ کہ سی پیک ڈٹ انا روٹ اٹی اسہ انچ اس ہم بدلی کننگ تنے۔

پاک چائنہ اقتصادی راہداری نا پوروی آن پاکستان ڈیہہ نا اہم انگا ملک جوڑ مریک و ہمسایہ ملک اوغانستان، ایران و ہندوستان تون اوار مچ آ مڈل ایسٹ داڈٹ آن فائدہ ہرفنگ کیک۔ داڈٹ انا اہمیت نا اندازہ داہیت آن جوانی اٹ خلنگ مریک کہ مسکوہی اِرا سال انا وخت سنٹرل ایشیاء نا کیہی ملک آتا سروک آک تینا ملک انا رابطہ ءِ سی پیک تون منسلک کننگ نا خواہش نا درشانی ءِ کرینو۔

سی پیک اٹی نیو کلیئر آن توانائی نا دوئی نا چار ڈٹ ہم اوارو ہرافتے ٹی ارٹ پورو مسنو وخت اس کہ ارٹ جاری ءُ اوکان بیدس ہم کولاشمسی توانائی و ایلو ذریعہ غاتیان بجلی نا دوئی نا ڈٹ اوارو ہرافتا پوروی آن 2018ء اسکان لوڈشیڈنگ یا تو چٹک یا معمولی نوعیت نا لوڈشیڈنگ سلک۔ صدر ممنون حسین پارے کہ ملک آن پسماندگی نا چٹفنگ کن تعلیم نسواں و پٹ و پولی تعلیم آ توجوہ تننگ نا گرج ءِ نیاڑیک تینا چناتے تعلیم نا ترغیب ایتر چناک غٹ اڑاند آتے مر کرسا تعلیم نا دوئی آ تجوہ تخر واہم تینا شناخت ءِ زائل مننگ آن اجتناب کرسا تینا راج و روایت آتا نمان خصوصیات آتیا سلر۔

راج انا نیمہ آبادی تعلیم و کاریم کپک تو شون نا عمل زہمی مریک۔ اوپارے کہ ای وزیر تعلیم آن سفارش کرینٹ کہ پرائمری اسکان تعلیم نا تدریسی عمل ءِ نیاڑی تا حوالہ کننگے انتئے کہ نیاڑیک نہ صرف چناتے مابت و شفقت تون خوانفنگ کیرہ بلکن گڑاس او خاہوت ہرا تینا چناتے مخلوط تعلیم ترفنگ خواپسہ اوفتے کن ہم آسانی ودی مریک۔ صدر مملکت پارے کہ ننا سرکڑدہ غاک وطن عزیز کن بیش بہاء خذمت سرانجام تسنو ۔

اللہ پاک ننا ملک انا سرکڑدہ غاتا تغ تا عملی تعبیر ءِ جوڑ کے۔ اوپارے کہ ملکی شون اکن المی ءِ کہ ہرابندغ تون ہرا زمہ واری ءِ او دیانتداری اٹ پورو کے تو وطن عزیز تینٹ شون نا کسر آ روان مریک۔ صدر مملکت بلوچستان اوپن محمد علی جناح شوٹنگ چیمپیئن شپ 2016ء نا غٹ منتظمین آتے مبارکباد ترسا پارے کہ داہفت دے ئی مقابلہ غاتے ٹی شریک مروک آک تینا ہنر و مہارت ءِ نشان ترسا صوبہ و ملک انا پن ءِ روشن کیرہ۔

اوپارے کہ بلوچستان نا پر فضاو زیبا انگا ہند یارت اٹی واقع قائد ریذیڈنسی بلاشبہ قائد اعظم محمد علی جناح نا بلوچستان نا الس تون بے پناہ مابت نا لازوال نشانی ءِ بانی پاکستان نا پن اتون منسوب فرسٹ بلوچستان اوپن محمد علی شوٹنگ چیمپیئن شپ2016نا اڈتننگ و اوٹی الس بالخصوص ورنا و نیاڑی تا پبی شرکت ننا مون آبروک آ راج انا آئینہ دار ءِ ہرادے نن قدر انا نظر اٹ ہرینہ و دامقابلہ غاتا اڈتننگ آ غٹ منتظمین خاص کر حکومت بلوچستان و پاکستان آرمی ءِ خراج تحسین پیش کینہ۔

صدر مملکت پارے کہ بلوچستان اٹی برسا ہر وار اسہ پوسکن ءُ اومیت و جتا ءُ خوشی اس ملک ہرانا درشانی ممکن اف۔ بلوچستان نا خلقت آتا جوزہ ، حب الوطنی ، جوزہ و خروش تینا مثال تینٹ ءِ۔ بلوچستان نا الس و ورنا تا دروشم آن چیلک تروک مابت و روشن اومیت ءِ خننگ اسہ قیمتی ءُ آزموندہ اسے ہرادے وخت اس ہم گیرام کننگ مفک۔داکان مست دودآن تران کرسا کمانڈر سدرن کمانڈ لیفٹیننٹ جنرل عامر ریاض دود اٹی شرکت آ صدر مملکت ممنون حسین نا منت واری ءِ ادا کرسا پارے کہ سم کاری نا مقابلہ غاتیٹی ورناتا پبی شرکت پرامن بلوچستان نا کوشست آتے سوگوی ایتک۔

ورناک ننا آخبت آک ءُ ہرا اسہ باوقار پاکستان نا امین ءُ۔ اوپارے کہ بلوچستان اینو تاریخ نا اسہ نازرک دور اسے آن گدرینگ انگ ءِ ننے غٹ ءِ اواری اٹ ملک دژمن عنصر آتا کوشست آتے بے سہب جوڑ کروئی مریک۔جنرل عامر ریاض امن نا بحالی کن پاک آرمی، ایف سی، پولیس ، لیویز ، بلوچستان کانسٹیبلری ، سول بیورو کریسی نا خذمت آتے خراج تحسین پیش کرسا دا پختہ عزم انا اعاد ہ ءِ کریر کہ غٹ سیکورٹی ادارہ غاک صوبہ نا شون و بحالی امن کن حکومت نا شانہ بشانہ سلوک سلرہ ۔

داکان مست صدر مملکت ممنون حسین سم کاری پوائنٹ آ ہنسا اولیکو بلوچستان اوپن محمد علی جناح شوٹنگ چیمپیئن شپ 2016ء نا افتتاح ءِ کرے اوڑتون اوار گورنر بلوچستان محمد خان اچکزئی، وزیراعلیٰ بلوچستان نواب ثناء اللہ خان زہری ، اسپیکر بلوچستان اسمبلی راحیلہ حمید خان درانی ، کمانڈر سدرن کمانڈ لیفٹیننٹ جنرل عامر ریاض ، صوبائی وزیر داخلہ میر سرفراز بگٹی ہم ساڑی ئسر، دود انا ایسری آ صدر مملکت کیہی اسٹال آتا دورہ ءِ ہم کرے۔