اسلام آباد(پاکستان نیوز پوائنٹ 04 اگست 2016ء) بنجائی وزیر سیفران جنرل (ر) عبدالقادر بلوچ پارینے کہ مسکوہی گورنر کے پی کے سردار مہتاب احمدخان گھوسٹ اسکول و ہسپتال آتانوٹس ءِ ہلسا اسکول آتیان چناتے ایلو تعلیمی ادارہ غاتیٹی گدریفنگ نا پارت کریسس واہم دا صفاءُ پارت اس ئس کہ اسہ ہم سرکاری ملازم اسے نوکری آن کشنگپ۔ پنچ شنبے آ قومی اسمبلی نا دیوان اٹی محمد جمال الدین نا فاٹا نا جتا شونداری اسکیم آتا خڑچ آتا بابت توجوہ مبذول نوٹس نا ورندی ءِ ترسا بنجائی وزیر جنرل (ر) عبدالقادر بلوچ پارے کہ مسکوہی گورنر کے پی کے سردار مہتاب احمد خان ریشنلائزیشن نا پالیسی اوڑکن درستی راستی کرفیسس انتئے کہ کیہی ہند آتیا گھوسٹ اسکول و ہسپتال ئس۔
اودننگا ہند آتیان چناتے ایلو اسکول آتے گدریفنگ نا حکم تس۔ واہم او پارت کریسس کہ اسہ ملازم اسے ہم ملازمت آن کشنگپ۔ اونا مسخت سرکاری آسراتی تیان گچین آن گچین فائدہ تروئی ئس۔ توجوہ مبذول نوٹس آ جمال الدین ، شاہدہ اخترعلی و آسیہ ناصر نا سوج آتا ورندی ٹی بنجائی وزیر جنرل (ر) عبدالقادر بلوچ پارے کہ قبائلی الس خاص کر سویلی و قطبی وزیرستان ملک اکن بے پناہ قربانی تسنو۔
داوخت اوفتا ٹھپ آتا داروکننگ ناءِ۔ قبائلی خوش متوس تو فاٹا ٹی امن امہ اڈ ہلیک۔ نن گورنر صاحب تون ہیت کرینن۔ ریشنلائزیشن نا پالیسی آ نظرثانی نا درخواست کرینن۔ داپالیسی تاحکم ثانی فریز تخنگک۔ قبائلی تا غٹ غاو تے مر کننگ کن بنجائی حکومت نا کنڈآن گورنر کے پی کے ءِ پارت جاری کننگانے۔ اوپارے کہ اسٹ اسینا ہم آئینی حق ءِ زہمی مننگ کن الیپنہ۔ ہچ ءُ اسکول و ہسپتال اس بند مفک۔ نن قبائلی الس نا ذہن تیٹی دہشت گردی ءِ مسترد کننگ نا سوچ ءِ ہنداوڑ ودی کننگ کینہ ہراتم نن اوفتے غٹ آسراتی تے ایتنہ ۔ ہنداوڑ فاٹاٹی امن بریک۔ فاٹا نا معاملہ غاتیا نظرثانی کن کمیٹی اس اڈتننگانے۔
