کوئٹہ(پاکستان نیوز پوائنٹ 04 اگست 2016ء) صوبائی وزیر داخلہ میر سرفراز بگٹی پارینے کہ پولیس و کانود نافذ کروک آ ادارہ غاک صوبائی دارالحکومت کوئٹہ ٹی بمب دھماکہ و ایلو سنگین ڈوہ تیٹی اوار 6خطرناک دہشت گرد آتے دزگیر کرینو۔ دزگیر دہشت گردآک عالمو چوک و سریاب روڈ آ بس اٹی مروک آ دھماکہ غاتون اوار کیہی واردات آتے امنا کرینو۔ داہیت ءِ او پنچ شنبے آ سول سیکرٹریٹ اٹی حکومت بلوچستان نا ترجمان انوارالحق کاکڑ، انسپکٹر جنرل پولیس احسن محبوب و صوبائی سیکرٹری داخلہ، ڈاکٹر محمد اکبر حریفال تون اوار پریس کانفرنس آن تران کرسا پارے۔
میر سرفراز بگٹی پارے کہ بلوچستا ن نا حالیت آتے خراب کننگ اٹی درملکی اودیم ایجنسی ”را“ و این ڈی ایس اوارے ہرافتا ٹھوس ثبوت مون آ بسنے وخت اس کہ را نا حاضر سروس آفیسر نا دزگیر بلوچستان اٹی درملکی نیام تمنگ نا صفاءُ ثبوت اسے۔ اوپارے کہ آجوئی و حق انا پن آ کودک خلقت آتے خلنگ انگ ءِ ولے کانود نافذ کروک آ ادارہ غاک الس نا کمک آن دہشت گردی نا برخلاف جنگ دلیری اٹ کننگ ءُ و زوت بلوچستان آن دہشت گردی نا ناسور ءِ چٹفنہ۔ میر سرفرازبگٹی پارے کہ نروک آتا سروک آتا قومی دنگ اٹی اوار مننگ مثبت حکومتی پالیسی و مذاکرات نا نتیجہ ءِ حکومت سلہہ بٹوک نروک آتے ببو خیرٹ پاہک۔