اسلام آباد(پاکستان نیوز پوائنٹ 04 اگست 2016ء) وزیراعظم محمد نواز شریف پارینے کہ پاکستان دہشت گردی، بدعنوانی و منظم ڈوہ اتون مون تننگ کن سارک نا باسک ملک آتون اواری اٹ کاریم کننگ کن پبی عزم تخک۔ آپریشن ضرب عضب و نیشنل ایکشن پلان آ موثر عملدرآمد نا کمک اٹ دہشت گردی نا برخلاف شون و شان سرسہبی دوئی کرینو۔ ڈیہہ نا شون و شونہالی کن مواصلاتی رابطہ المی ءِ۔
اوداہیت ءِ پنچ شنبے آ داڑے سویلی ایشیاء ملک آتا علاقائی تنظیم سارک انا ہفت میکو وزراء داخلہ کانفرنس نا افتتاحی نشست آن تران کرسا پارے۔ وزیراعظم پارے کہ دا وژن داسال نومبر اٹی پاکستان نا میزبانی ٹی مروک آ 19می سارک سمٹ نا ایجنڈہ ٹی کمکار مریک۔ وزیراعظم سارک وزراء داخلہ ءِ پارے کہ قومی کہول آ پاکستان آپریشن ضرب عضب و نیشنل ایکشن پلان آ موثر عملدرآمد نا کمک اٹ دہشت گردی نا برخلاف شون و شان سرسہبی دوئی کرینے۔
داسرسہبیک تینا گل زمین آن دہشت گردی نا لعنت نا چٹفنگ کن حکومت عزم انا غماز ءُ۔ وزیراعظم پارے کہ چیلنج آتا باوجود سارک سویلی ایشیاء ٹی علاقائی ہم آہنگی نا مسخت نا دوئی ٹی قابل تحسین کڑدادا کرینے واہم تنظیم ءِ زیات گچین و فعال جوڑ کننگ کن حکومت و سارک ادارہ غاتے کن المی ءِ کہ او تنظیم ءِ زیات مفید جوڑ کننگ کن سخت کوشست کیر۔ وزیراعظم پارے کہ سارک نا ڈیہہ انسانی و قدرتی وسیلہ غاتیان مالامال ءِ ، تینا الس نا امن و شونہالی کن علاقائی لائخی ءِ پبی وڑاٹ کاریم اٹ ہتنگ کن اسہ پلیٹ فارم اس مہیا کننگ نا گرج ءِ۔
وزیراعظم نواز شریف پارے کہ داوڑنا اپروچ شون و پرامن ہمسائیگی کن ننا حکومت نا امن نا وژن آن ہم آہنگ ءِ۔ اوپارے کہ پاکستان سارک ءِ اونا منشور اٹی بیان کروک غرض و مسخت آتے مون آ دننگ کن سارک نا کنڈآن چست کروک آ گام گیج آتا مخ تف ءِ۔ پاکستان سمجھک کہ ڈیہہ نا شون و شونہالی کن مواصلاتی رابطہ المی ءِ و او ڈیہہ نا تہہ ٹی شاہراتی ، فضائی ، ریل و آبی رابطہ غاتا اصولی مخ تفی ءِ کیک۔
اوپارے کہ سارک ءِ ڈیہہ ٹی راجی واقتصادی شون اکن است خواہی نا حامل ملک آتون رابطہ غاتے گچین کہول آ استوار کروئی مرے۔ اوپارے کہ سارک چارٹر اٹی بیان کروک مسخت و ہدف آتا دوئی ننا اجتماعی زمہ واری ءِ۔ اومیت کینہ کہ دیوان اٹی کروک آ فیصلہ باسک ملک آتانیام اٹ کمکاری ءِ ودفنگ اٹی ننا کوشست آتے سوگوی فراوان کیک۔ وزیراعظم پارے کہ علاقہ ٹی امن ، آجوئی ، راجی انصاف و اقتصادی شونہالی ہتنگ کن تقریباََ مسہ دہائی مست سارک نا وجود ءِ عمل اٹی ہتنگا۔
اوپارے کہ ودوک آ رابطہ و عالمگیریت تون باسک ملک آتے اسیجائی چیلنج و خدشہ غاک اریر ۔ اوپارے کہ دہشت گردی ، منشیات نا واپار، سائبر ڈوہ و نیاڑی و چناتا ٹریفکنگ نا انسداد کن اسیجائی حکمت عملی تین پہ تینی انحصار نا گرج ءِ کیک۔ داکان مست سارک نا سیکرٹری جنرل ارجن بہادر تھاپا تینا ہیت آتے ٹی پارے کہ نارکوٹکس ، دہشت گردی، سائبر ڈوہ و ایلو بین الاقوامی ڈوہ اتون مون تننگ کن گچین گام گیج آتا گرج ءِ۔ اوپارے کہ سارک ہر وڑنا دہشت گردی نا مذمت ءِ کیک۔ دالعنت نا انسداد کن باسک ملک آتا نیام اٹ گچین کمک درکارءِ۔ سیکرٹری جنرل پارے کہ ہفت میکو سارک دیوان مسکوہی دیوان آتیٹی کروک آ فیصلہ غاتیا پیش رفت نا جاچ ءِ ہلیک۔