کوئٹہ(پاکستان نیوز پوائنٹ 04 اگست 2016ء) صدر مملکت ممنون حسین ءَ گشتگ انت کہ پاک چین اقتصادی راہداری منصوبہ ءِ سرجمی ءَ معاشی ءُُ اقتصادی دیمروی ءِ نوکیں باک ءِ بندات بیت ءُُ مردم آنی ھاتر ءَ روزگار ءِ شریں موہ پیداک بیت۔ سر وزیر بلوچستان نواب ثناء اللہ زہری ءُُ گورنر بلوچستان محمد خان اچکزئی ءَ کوئٹہء َ گند ءُُ نندءِ وھد ءَ صدر مملکت ءَ گشتگ کہ بلوچستان ءَ امن ءُُ ایمنی ءِ جاورال شر انت حکومتءِ پیسلہ انت کہ صوبہ ءَ اُلس ءِ دیمروی شری، امن ءُُ ایمنی ءِ بحالی ءُُ دیمروی کار آنی راہ ءَ یک وڑیں رکاوٹ ءَ برداشت نہ کنگ بیت۔
آئی ءَ گشتگ کہ سی پیک منصوبہ، گوادر ڈیپ سی منصوبہ ءِ اپ گریڈیشن ، گوادر پورٹ ایکسپریس وے ءُُ گوادر میاں استمانی ایئر پورٹ ءِ جوڑ کنگ ءَ صوبہ ءَ معاشی دیمروی ءِ نوکیں در پچ بیت ءُُ روزگار ءِ نوکیں موہ پیداک بیت۔ صدر مملکت ءَ گشتگ کہ حکومت صوبہ ءَ برجاہ منصوبہ ءِ یک وھد ءَ سرجمی ءِ ھاتر ءَ پر ازم انت مئے کوشست انت کہ بلوچستان ءَ ہم دومی صوبہ آں بروبر بیار انت۔
صدر مملکت ءَ اُلس ءِ دیمروی ءِ ھاتر ءَ صوبائی حکومت ءِ کوشست آں سہڑائینگ ءَ گشتگ کہ درستیں برجاہ دیمروی منصوبہ آں بر وقت سرجم کنگ ءُُ معیار ءَ یقینی جوڑ کنگ ءِ ھاتر ءَ مانیٹرنگ ءَ دِگہ شر جوڑ بہ کن انت ءُُ درستیں منصوبہ آں ساپ جوڑ بہ کن انت۔ سر وزیر بلوچستان نواب ثناء اللہ زہری ءُُ گورنر بلوچستان محمد خان اچکزئی ءَ بلوچستان ءِ دیمروی ءُُ جاورال ءَ صدر مملکت ءِ نیمگ ءَ باز دلچسپی گرگ ءِ سرا شکر ءَ گپت انت۔
گورنر ءُُ سر وزیر ءَ صدر مملکت ءَ صوبہ ءَ برجاہ دیمروی منصوبہ ءُُ ھاسیں سیاسی ءُُ انتظامی امور ءِ سرا سرجمی ءَ بریفنگ داتگ۔ دیما گورنر گِس ءَ آھگ ءَ صدر مملکت ءَ بلوچستان کانسٹیبلری ءِ چاک ءُُ چوبند دستگ ءَ گارڈ آف آنر پیش کرتگ۔ کوئٹہ ءِ ایئر پورٹ سر بوھگ ءَ گورنر بلوچستان محمد خان اچکزئی ، سر وزیر بلوچستان نواب ثناء اللہ زہری ، وزیر داخلہ بلوچستان میر سر فراز بگٹی، کمانڈر سدرن کمانڈ ، آئی جی ایف سی میجر جنرل شیرافگن ، آئی جی پولیس ءُُ برزیں حکام ءَ صدر ممنون حسین ءَ وش آت کرت انت۔ صدر مملکت کوئٹہ ءِ تر ءُُ تاب ءَ صوبائی اسمبلی ءِ باسک، پارلیمانی گل ءُُ عمائدین آں ہم گند ءُُ نند کنت۔
