اسلام آباد(پاکستان نیوز پوائنٹ 28مارچ2017ء) وزیراعظم محمد نواز شریف پارینے کہ پاک چین سنگتی پوسکن آ بڑزی تیا ٹی ءِ ہرا سی پیک و اہم اقتصادی بشخ آتیٹی تین پہ تینی کمک آن ظاہر ءِ۔ چین اتون پاکستان نا کمک نئے بیرہ ہڑتوم آ ملک آتیٹی شونہالی اتیک بلکن مچ آ ڈیہہ کن شونداری نا ذریعہ مریک۔ اوداہیت ءِ چائنہ ایروسپیس سائنس و انڈسٹری کارپوریشن نا چیئرمین آف بورڈ گاؤہونگ وائی و چدائنہ پریسیزن مشینری امپورٹ ایکسپورٹ کارپوریشن نا چیئرمین آف بورڈ ژاو چیاولونگ تون سے شنبے نا دے داڑے ہیت وگپ اٹی پارے۔
وزیراعظم پارے کہ پاکستان نا اسٹریٹجک محل و وقوع اودے ایشیا نا اہم واپاری، توانائی و ٹرانسپورٹ کوریڈو جوڑ کیک۔ چین اتون پاکستان نا کمکاری نئے بیرہ ہڑتوم آ ملک آتیٹی شونہالی اتیک بلکن مچہ آ ڈیہہ کن شونداری نا ذریعہ مریک۔ وزیراعظم پارے کہ ساڑی حکومت اولیکو دے آن ہی معیشت نا بحالی، توانائی تنکی ءِ مر کننگ، سیکورٹی نا حالیت آتے گچین جوڑ کننگ و زرکارآتے مناسب وارخواہی فراوان کننگ آ چکار تخا۔
اوپارے کہ پاکستان نا اقتصادی منظرنامہ گدرینگوک آ چار سال اٹی یکسر بدل مسنے ہرانا اعتراف ءِ جہانی کہول آ ہم کننگ انگ ءِ۔ وزیراعظم دا ہیت آ زورشاغا کہ پاکستان نا زرکاری پالیسی براہ راست درملکی زرکاری ءِ راغب کننگ کن ساز گار کاروباری فضاء کن جامع ڈھانچہ فراوان کیک۔ اوپارے کہ پاکستان نا پالیسی رجحانات لبرلائزیشن ، ڈی ریگولیشن ، پرائیویٹا ئزیشن آن ہم آہنگ ءِ و زرکارآتے گچین آسراتی فراوان کننگ انگ ءِ۔
وزیراعظم ہڑتوم آ کمپنی تا چیئرمین تے زرکاری وارخواہی آن استفادہ کننگ نا دعوت ترسا پارے کہ پاکستان کٹیا دننگ آ ہچ ءُ پابندی اس عائد کپک و آزادانہ زرکاری کن پرکشش چاگڑد اس ارے۔ چینی کمپنی نا سروک آک جم و جوش اٹ خیر مقدم آ وزیراعظم نا منت وار ی ءِ ادا کرسا پاکستان تون کاروباری رابطہ غاتا مون آ دننگ نا عزم انا درشانی ءِ کرے۔ وزیراعظم ءِ داہم پاننگاکہ چینی کمپنیک تعلقدار کمامدارآتون مست آن رابطہ ٹی ءُ۔ بنجائی وزیر سائنس و ٹیکنالوجی رانا تنویر حسین ، چین نا سفیر سن وائی دونگ و ایلو سینئر کمامدارآک ہم اوڑدہی ٹی ساڑی ئسر۔