اسلام آباد(پاکستان پوائنٹ نیوز 03 -اگست 2016ء) آرمی چیف جنرل راحیل شریف چارشنبے آ چین نا پیپلز لبریشن آرمی نا ٹریننگ بیس کورلہ ٹی جاری انسداد دہشت گردی مشق آتا جاچ ءِ ہلک ، دامشق آک پوسکن انگا ڈغاری و فضائی ازباب آتے کاریم اٹ ہتسا سخت انگا مشی آ علاقہ غاتیٹی دہشت گرد آتا اسہ اڈہ اسے گچین وڑاٹ ناکارہ جوڑ کننگ نا گچین کارروائی نا تناظر اٹی ترتیب تننگانے۔
آرمی چیف دہشت گردی نا مقابلہ ءِ کننگ نا پیپلز لبریشن آرمی نا ورناتا کاریم نا کچ و کرت وکار نا ستاءِ کرے ۔ اوغانستان و تاجکستان نا آرمی چیفس ہم داوخت آ ساڑی ئس۔ آرمی چیف جنرل راحیل شریف داوخت آ ڈس پلے سینٹر نا ہم دورہ ءِ کرے ہراڑے او چینی فوج انا کاریم اٹ ہتوک پوسکنا دفاعی ازباب آتا مشاہدہ ءِ کرے۔ داکان مست چیف آف آرمی اسٹاف جنرل راحیل شریف اسہ دے ئی دورہ غا چین نا شار ارومچی آ سرمس۔
پاک فوج انا شعبہ تعلقات عامہ (آئی ایس پی آر) نا رداٹ آرمی چیف چین نا پیپلز لبریشن آرمی نا چیف آف جنرل اسٹاف جنرل وانگ تون اوڑدہی کرے ہراٹی ہڑتوم آ ملک آتا سلہہ بند فوج آتیٹی کمکاری، ہڑتوم آ کنڈآتا سیکورٹی کمک و چین پاکستان اقتصادی راہداری ڈٹ اکن سریس وختی سیکورٹی تون اوار ایلو معاملہ غاتیا درشانِ خیال کننگا۔ آرمی چیف اسہ دے ئی دورہ چین نا وخت آ ارومچی ٹی صوبہ سنکیانگ نا کمونسٹ پارٹی نا سیکرٹری ژانگ جن شیان تون جتا اوڑدہی کرے ہراٹی پاک چین ہڑتوم آ کنڈآتا تعلقداری و علاقائی سلامتی آن بابت معاملہ خاص کر پاک چین اقتصادی راہداری نا پوروی و سیکورٹی نا معاملہ غاتیا شرہ مس۔
