وزیراعظم محمد نواز شریف نا ترکمانستان نا پارلیمان نا چیئرپرسن اکاجانور بردییف نا سروکی ٹی ڈل اتون ہیت وگپ

وزیراعظم محمد نواز شریف نا ترکمانستان نا پارلیمان نا چیئرپرسن اکاجانور بردییف نا سروکی ٹی ڈل اتون ہیت وگپ

اسلام آباد(پاکستان پوائنٹ نیوز 03 -اگست 2016ء) وزیراعظم محمد نواز شریف پارینے کہ ترکمانستان ، اوغانستان ، پاکستان، بھارت گیس پیپ لین (تاپی) مچ آ ڈیہہ کن بے کچ اہمیت نا حامل ڈٹ اسے، ڈٹ انا زوت پوروی آن توانائی نا سیکورٹی و علاقائی شونہالی نا اسیجائی مسخت نا دوئی ٹی کمک رسینگک۔ اوداخیال آتا درشانی ءِ چارشنبے آ داڑے وزیراعظم ہاؤس اٹی ترکمانستان نا مجلس نا چیئرپرسن اکاجانور دییف نا سروکی ٹی ڈل اتون ہیت وگپ کرساکرے۔

وزیراعظم پارے کہ پاکستان نا گیس انا گرج آتے پورو کننگ آن بیدس داڈٹ علاقہ ءِ اقتصادی و سیاسی لحاظ آن اسہ ایلو ٹی ملفنگ کمکار ثابت مریک۔ وزیراعظم پارے کہ پاکستان و ترکمانستان نا نیام اٹ پارلیمانی ڈل انا وقتاََ فوقتاََ دورہ غاتیان ہڑتوم آ برادر ملک آتیٹی جمہوریت نا سوگوی ٹی کمک رسینگک۔ اوپارے کہ پاکستان و ترکمانستان نا دوستانہ تعلقداری ءِ ولے ہڑتوم آ کنڈآتا تعلقداری نا دنگ و خاص کر اقتصادی رابطہ غاتے پین مون آ دننگ نا بھلو گنجائش اس ارے۔

اوپارے کہ نن پارلیمنٹ نا باسک پارلیمانی کمیٹی و پارلیمانی سنگتی رڑآتا نیام اٹ پین رابطہ کننگ خوانہ۔ وزیراعظم ترکمانستان نا آجوئی نا 25می سال دے آ ترکمانستان نا صدر قربان گلی بردی محدوف و ترکمانستان نا الس ءِ دلی مبارکبادی تس و ترکمانستان نا صدر نا کنڈآن نیک است خواہی نا ورندی ٹی ہنداوڑنا جوزہ غاتا درشانی ءِ کرے۔ ترکمانستان نا مجلس نا چیئر پرسن پاکستان اٹی اونا ڈل انا جم و جوش اٹ بیا بخیر کننگ آ وزیراعظم نا منت واری ءِ ادا کریر و ترکمانستان نا صدر قربان گلی بردی محمدوف نا کنڈآن وزیراعظم محمد نواز شریف نا سرسہب آپریشن آ مبارکبادی تسر۔

اوپارے کہ ترکمانستان نا صدر ذاتی وڑاٹ جتا ڈٹ آتا چاروکی ءِ کننگ ءِ تانکہ اوفتے معیاری وڑاٹ وخت انا کاٹم آ پورو کننگ مرے۔ ترکمانستان نا توانائی نا نائب وزیرتاج محمد ی دوف داوخت آ پارے کہ تاپی گیس پیپ لین ڈٹ دسمبر 2019 ء اسکان پورو مریک۔ اوپارے کہ 15کلو میٹر پیپ لین مست آن شاغنگانو وخت اس کہ 80 کلو میٹر نا پیپ لین آ ارضیاتی و تکنیکی کاریم داوخت آ جاری ءِ۔

ترکمانستان نا ڈل اٹی ترکمانستان نا مجلس نا نائب چیئرمین مقست باب ییف ، پاکستان اٹی ترکمانستان نا سفیر عطادجان این مولاموف و ایلو پارلیمنٹ نا باسک آک اوارئسر وخت اس کہ اوڑدہی ٹی اسپیکر قومی اسمبلی سردار ایاز صادق ، وزیراعظم نا خصوصی کمکار برائے امور طارق فاطمی، باسک قومی اسمبلی شکیلہ لقمان و ایلو بڑزکو کمامدار آک ہم ساڑی ئسر۔