اسلام آباد۔(پاکستان پوائنٹ نیوز 03 -اگست 2016ء) وزیراعظم محمد نواز شریف پارینے کہ آزاد کشمیر نا پوسکن گچین مروک آ حکومت ءِ ریاست نا معاملہ کار ءِ گچین جوڑ کننگ نا کوشست آتیٹی ہروڑنا کمک فراوان کینہ۔ او چارشنبے آ داڑے آزاد کشمیر نا پوسکن گچین مروک آ وزیراعظم راجہ فاروق حیدر خان تون ایوان وزیراعظم اٹی اوڑدہی نا وخت آ درشانِ خیال کریکہ۔ ایوان وزیراعظم آن جاری پریس ریلیز نا رداٹ داوخت آ بنجائی وزیر اطلاعات و نشریات سینیٹر پرویز رشید و وزیراعظم نا خصوصی کمکار ڈاکٹر آصف کرمانی ہم ساڑی ئسر۔
وزیراعظم نواز شریف راجہ فاروق حیدر خان ءِ آزاد کشمیر نا وزیراعظم گچین مننگ آ مبارکبادی ترسا اومیت ظاہر کرے کہ پوسکن گچین مروک آ حکومت آزاد کشمیر نا الس نا شون و شونہالی کن سخت خواری کیک۔ وزیراعظم پارے کہ آزاد کشمیر نا الس ننا منشور آ پبی پت انا درشانی ءِ کرینو و داسا دا ننا اجتماعی زمہ واری ءِ کہ نن اوفتا خذمت ءِ کین۔ شونداری و انفراسٹرکچر نا ڈٹ آتیا گچین عملدرآمد و اوفتا بروخت بایدے مرے تانکہ آزاد کشمیر نا الس ننا شونداری ایجنڈہ غان مستفید مننگ کیر۔
وزیراعظم نواز شریف پارے کہ غٹ سرکاری بشخ آتا ڈٹ آتا پوروی ٹی میرٹ و شفافیت ءِ ملحوظ خاطر تخنگے۔ غٹ شونداری ڈٹ آتا مسخت الس نا زند انا آب ءِ گچین جوڑ کروئی مرے۔ اوپارے کہ نقل و حمل نا گچین آسراتی و روڈ نیٹ ورک گچین مننگ آن آزاد کشمیر نا زیباانگا علاقہ غاتسکان دنیا نا رسینگ ممکن مریک و اوڑآن علاقہ ٹی اقتصادی سرجزآتیٹی ودکی مریک۔ وزیراعظم پارے کہ آزاد کشمیر نا الس نا کنڈآن گچین کاری تیٹی پبی پت کننگ آ اوفتا است انا ھب اٹ منت وار ءِ داسا دا ننا زمہ واری ءِ کہ نن تینا کارکڑدءِ نشان ایتن ۔
داوخت آ راجہ فاروق حیدرخان وزیراعظم پاکستان نا منت واری ءِ ادا کرسا اودے یخین دہانی کرفے کہ آزاد کشمیر نا حکومت سروک نا وژن آ اونا روح انا وڑ عملدرآمد ءِ باوری جوڑ کننگ کن غٹ المی گام گیج چست کیک۔ گچین حکومت بیدس سیاسی وابستگی نا الس نا ہمووڑ خذمت ءِ کیک ہراوڑ اودے مچ آ آزاد کشمیر نا مینڈیٹ ملانے۔
