اسلام آباد(پاکستان پوائنٹ نیوز 03 -اگست 2016ء) بنجائی وزیر جنرل (ر) عبدالقادر بلوچ پارینے کہ سعودی عرب اٹی محصور پاکستانی پردیسی تا معاملہ سنجیدہ نوعیت نا ءِ، 520پاکستانی تا کنڈآن کمپنی نا کنڈآن تنخواہ ملپننگ نا غاو آک ملانو۔ سمندرپارپاکستانی تا وزارت معاہدہ نا خلاف ورزی کروک آ کمپنی تا جاست وپاست ءِ کیک، سعودی کمپنی اوجر وطن آ پدی بروک آ خواہش مند آتے ٹکٹ تننگ و اقامہ ٹرانسفر کرفوک آتا کمک نا پیش کش کرینے۔
چارشنبے آقومی اسمبلی نا دیوان اٹی میر عامر علی خان مگسی نا سعودی عرب اٹی محصور پاکستانی پردیسی تا بابت توجوہ مبذول نوٹس نا ورندی ءِ ترسا بنجائی وزیر جنرل (ر) عبدالقادر بلوچ پارے کہ دا اسہ سنجیدہ ءُ ویل اسے، داوخت تقریباََ اِرا ملین آن زیات پاکستانی سعودی عرب اٹی کاریم کننگ ءُ۔ اوفتے آن 520 بندغ آک غاو کرینو کہ تعلقدار کمپنیک اوفتے تنخواہ تتنو۔
اوپارے کہ داکان گڑاس ایجنٹ کم اہلیت تخوک آتے ہم پیشن نا ملک آ گدریفرہ و پیشن نا ملک ہراتم کمپنی تا درکار معیار آ پورو سلپسہ تو اوفتے کشنگک۔ حکومت دامعاملہ آن جوانی اٹ سماءِ ، سمندرپار پاکستانی تا وزارت پاکستان اٹی معاہدہ نا خلاف ورزی کروک کمپنی تا برخلاف جاست وپاست کیک۔ توجوہ مبذول نوٹس آ میر عامر مگسی ، مراد سعید، ساجد نواز، کرنل (ر) امیر اللہ مروت و غلام سرورخان نا سوج آتا ورندی ٹی بنجائی وزیر پارے کہ سعودی کمپنی اوجر نا زہمی بندغ آتا کچ 8ہزار ءِ۔
داکمپنی نا جنرل منیجر تون رابطہ کننگانے ، کمپنی پارینے کہ ہموبندغ غاک ہرا وطن آ پدی ہِننگ خوارہ کمپنی اوفتے ٹکٹ ہم ایتک و ہرابندغ آک اقامہ ٹرانسفر کرفنگ خوارہ اوفتا کمپنی نا کنڈآن کمک ءِ کننگک۔ اسہ پین سوج اسے نا ورندی ٹی اوپارے کہ دامعاملہ غاوزارت خارجہ تون ہیت کننگک و باسک آتے وزارت خارجہ آن بریفنگ نا ہم بست و بند ءِ کننگک۔ اوپارے کہ سعودی عرب تون ننا خصوصی تعلقداری ءِ۔
نن خواپنہ کہ سعودی عرب اٹی کاریم کروک پاکستانی تا روزگار زہمی مرے۔ حکومت ءِ دامعاملہ غا بھاز گڑتی ءِ و دارداٹ ہر وڑنا گام گیج چست کننگ انگ ءِ ۔ ڈپٹی اسپیکر پارت کرے کہ غٹ تعلقدار باسک آتے وزارت خارجہ نا کنڈآن بریفنگ تننگے و پارلیمنٹ ءِ اسہ ہفتہ سے نا تہہ ٹی دابابت پورو رپورٹ پیش کننگے۔ اگہ وزارت خارجہ نا ڈیوالائی ثابت مس تو پارلیمنٹ نا کنڈآن سخت ایکشن ہلنگک۔
توجوہ مبذول نوٹس آ اسہ پین سوج اسے نا ورندی ٹی بنجائی وزیر جنرل (ر) عبدالقادر بلوچ پارے کہ گڑاس ریکروٹنگ ایجنسی خلقت آتے سوز باغ نشان ترسا پیشن گدریفرہ و ہراتم معاہدہ نا رداٹ تنخواک ملپسہ تو غاو آک مون آ بریرہ ، دننگا کمپنی تا برخلاف کارروائی کننگک۔ مچ آ دنیاآن ننے داغاوک ملنگ ءُ۔ ملک انا بدنامی نا سوب جوڑ مروک آ ریکروٹنگ ایجنسی تا برخلاف سخت ایکشن ہلنگک۔ اسہ پین سوج اسے نا ورندی ٹی اوپارے کہ 12لکھ پاکستانی ورکرآتا پدی بننگ نا نن تون ہچ ءُ احوال اس اف۔ جیل آتیٹی بند پاکستانی تے ہم کانودی کمک فراوان کننگ انگ ءِ۔
