جعفر آباد۔(پاکستان پوائنٹ نیوز 03 -اگست 2016ء) جعفرآباد نا علاقہ اوستہ محمد اٹی نادرست سلہہ بند بندغ آک اُراسے ٹی پترینگسا سم کاری نا نتیجہ ٹی چناو نیاڑی تتون اوار 3بندغ تپاخت و 2نیاڑی ٹھپی مسر۔ پولیس نا رداٹ جعفرآباد نا علاقہ اوستہ محمد پولیس تھانہ صدر نا دنگ گوٹھ سہراب خان جمالی ٹی محمد بخش پنی ءُ بندغ اسینا اُراٹی نادرست سلہہ بند بندغ آک متکن ءُ دشمنی اسینا بناء آ اُراٹی پترینگسا سم کاری کریر ہرانا نتیجہ ٹی محمد بخش ، حیدر بخش و نزیراں بی بی موقع غاہی تپاخت وخت اس کہ کشمیرہ بی بی و خانزادی بھاز ٹھپی مسر ، دوبہ دارآک موقع واردات آن نرنگ اٹی سرسہب مسر۔
پولیس و سیکورٹی فورسز آتے احوال ملنگ تون ہی جاگہ غا سرمرسا لاش و ٹھپی تے دمدستی وڑاٹ ہندی ہسپتال آ گدریفیر وخت اس کہ المی کارروائی آن گڈ لاش آتے اوفتا وارث آتا حوالہ کریر، تپاخت و ٹھپی تا تعلق اسہ ہی خاہوت اسیان ءِ، پولیس و سیکورٹی فورسز آک علاقہ نا ناکہ بندی ءِ کرسا دوبہ دارآتا پٹنگ نابناءِ کرینو۔
