ہندوتا دربار آ جلہو کروک آتے بایدے سزاملے، واقعہ نا پورو جاست و پاست ءِ کرفنگے

اسلام آباد (پاکستان پوائنٹ نیوز 02 -اگست2016 ء) مسلم لیگ(ن) نا باسک قومی اسمبلی ڈاکٹر درشن پارینے کہ ہندوتا دربارآ جلہو کروک آتے بایدے سزاملے و واقعہ نا پورو جاست وپاست ءِ کرفنگے۔ سے شنبے آ قومی اسمبلی نا دیوان اٹی ڈاکٹر درشن توجوہ مبذول نوٹس اٹی پارے کہ گھوٹکی ٹی قرآن پاک ءِ ہُشنگ نا واقعہ پیش بس۔ اسہ بندغ اسے ہلسا ایف آئی آر ءِ درج کننگا۔ اوکان گڈ ہموڑے برانز نا بناء مس و ہندوتا دربارآ جلہو کننگا۔ ہندوبرادری قرآن پاک نا گیتا آمبار شرف ءِ کیرہ۔ ہرابندغ ءِ ہلنگانے پولیس نا رداٹ او مسلمان مسنے و ذہنی عارضہ ٹی ہم مبتلا ءِ ولے ننا دربار آ جلہو نا ہچ ءُ جواز اس ہلوکہ۔ اوپارے کہ ہراہم دادے کرینے سزا اودے بایدے ملے۔ داواقعہ غاتا پورو جاست وپاست ءِ کرفنگے ۔