اسلام آباد (پاکستان پوائنٹ نیوز 02 -اگست2016 ء) قومی اسمبلی ٹی کل پارلیمانی جماعت آک احتساب نا عمل ءِ شفاف جوڑ کننگ کن کانود سازی و ایلو معاملہ غاتا جاچ اکن اسیجائی پارلیمانی کمیٹی اس جوڑ کننگ نا صلاح آن اتفاق کرینو، کمیٹی جوڑ کننگ نا صلاح حکومت نا کنڈآن بنجائی وزیر زاہد حامد تس۔ اپوزیشن جماعت آتا کنڈآن موقف اختیار کننگاکہ احتساب نا جامع کانود وخت انا گرج ءِ، داچرجوئی ٹی ہرے کننگپ۔
احتساب نا ادارہ ءِ سیاسی مسخت آتے کن کاریم اٹ بایدے ہتنگپ وخت اس کہ ایم کیو ایم نا کنڈآن قومی احتساب (ترمیمی )بل 2016ء ءِ ہم ایوان اٹی پیش کننگا ہرادے تعلقدار کمیٹی نا حوالہ کننگا۔ سے شنبے آقومی اسمبلی نا دیوان اٹی ایم کیو ایم نا باسک شیخ صلاح الدین تینا ایلو سنگت آتون تحریک پیش کرے کہ قومی احتساب ترمیمی بل 2016ء ءِ پیش کننگ نا موکل تننگے۔
وزیر کانود زاہد حامد پارے کہ داچرجوئی ٹی اِرا مسہ بل بسنے۔ قائمہ کمیٹی اسہ ذیلی کمیٹی اس ہم جوڑ کریسس تانکہ دابل آتا جاچ ءِ ہلسا متفقہ بل ءِ مون آ ہتنگے۔ حکومت ہم داہیت انا خواہندار ءِ کہ اسہ بھلو بنداواحتساب نا بل اس ہتنگے۔ جوا ن ءِ کہ دامعاملہ غا سینیٹ و قومی اسمبلی نا اسیجائی کمیٹی اس جوڑ کننگے ہرا قومی احتساب کمیشن ایکٹ اٹی ترمیم ہتنگ آ اتفاق رائے ودی کیر۔
دابل ءِ وختی وڑاٹ موخر کننگے۔ شیخ صلاح الدین پارے کہ اگہ پارلیمانی کمیٹی اس جوڑ مرے تو دا جوان مریک واہم ہچ ءُ تاخیری حربہ اس کاریم اٹ بایدے بف۔ عمران ظفرلغاری پارے کہ داکان مست ہم بھاز ہرے مسنے۔ اسہ ادارہ اس ہم بایدے سیاسی مسخت کن استعمال مف ۔ زوت آن زوت کمیٹی اس جوڑ کننگے۔ اسپیکر نا استفسار آ وزیر کانود زاہد حامد پارے کہ او دا چرجوئی ٹی پارلیمانی راہشون و سینٹ ءِ پت اٹی ہلسا مون آ کاہک۔ عیسیٰ نوری ہم پارلیمانی کمیٹی اس اڈتننگ آ اتفاق کرے۔ اسپیکر بل ءِ پیش کننگ نا بابت ایوان نا رائے ءِ ہلک۔ ایوان آن تحریک نامنظوری آن گڈ شیخ صلاح الدین قومی احتساب کمیشن (ترمیمی ) بل 2016ء ءِ ایوان اٹی پیش کرے۔
