اسلام آباد(پاکستان پوائنٹ نیوز۔ یکم اگست۔2016ء) مزن وزیر محمد نواز شریف ءَ صدر مملکت ممنون حسین ءِ گوں دو شمبے ءَ ایوان صدر ءَ گند ءُُ نند کرتگ۔ گند ءُُ نند ءَ دوئیں راھشون آں ملک ءِ عمومی جاورال ءُُ ھاسیں راجی امور ءِ سرا گپءُُ تران کرت انت۔ صدر مملکت ممنون حسین ءَ مزن وزیر ءَ جان سلامتی ءِ یک بار پدا مبارکباتی داتگ ءُُ اے امیت ءِ درشانی کرتگ کہ مزن وزیر نوا ز شریف درستیں توانائی ءِ گوں ملک ءُُ راج ءِ ھذمت بہ کنت۔
گند ءُُ نند ءَ پاک چین اقتصادی راہداری منصوبہ ءِ ردا توانائی ءِ برجاہ منصوبہ، امن ءُُ ایمنی ءِ جاورال، آپریشن ضرب عضب ءُُ راجی معیشت ءِ ءِ معاملہ ءِ سرا ھیال ءُُ لیکھہ کرت انت۔ مزن وزیر ءَ اے موہ ءَ صدر مملکتءَ لہتیں چیز آں حکومتءِ پالیسی ءُُ پیسلہ آں ہم آگاہ کرتگ۔ صدر مملکت ءَ گشتگ کہ مزن وزیر ءُُ آئی اقتصادی ٹیم وتی سوگو حکمت عملی ءِ ردا بنجاہی معیشت ءِ شر تری ءِ ھاتر ءَ قابل قدر کرد پیش دارگ ءَ انت آئی ءَ میاں استمانی پڑ ءَ ہم سہڑائینتگ ءَ انت۔
دوئیں راھشون آں دست بندی کرتگ انتکہ ملک ءَ محکم ءُُ دیمروی ءِ ھاتر ءَ اے دیمروی منصوبہ آنی سرجمی ءَ حکومت ءِ گوں کمک بہ کن ات۔ دوئیں راھشون آں گشت انت کہ حکومت دیمروی ایجنڈا ءَ وتی توجہ دور مہ کن ات ءُُ ملک ءِ دیمروی ءُُ اُلس ءِ معیار زند ءَ شر تری ءِ ھاتر ءَ دیمروی منصوبہ سرجم کنگ ءِ ھاتر ءَ تند ءَ چہ کار کنگ بہ بیت ۔ آئی ءَ گشتگ کہ حکومت دیمروی کار ءِ وھد ءَ بنجاہی سرمائے ءِ درست ءُُ سا پ کار مرز ءَ ہر جاور ءَ یقینی جوڑ بہ کنت ءُُ بد عنوانی ءَ یک ہم پڑ ءَ برداشت کنگ نہ بیت۔
صدر مملکت ءُُ مزن وزیر ءَ آپریشن ضرب عضب ءِ وھد ءَ رستیں سر سوبی آنی سرا تسلا ءِ درشانی کنگ ءَ گشتگ کہ ملک ءَ آھری نا شرکاری ءِ تاں ھلاسی ءَ اے آپریشن برجاہ مانیت۔ دوئیں راھشون آں نا شرکاری ءُُ انتہا پسندی ءَ دو چار ءِ ھاتر ءَ سلاہ بندیں اُرد ءُُ قانود نافذ کنوکیں ادارگ آنی افسر ءُُ ورنا آنی قربانی آں ستا پیش کرت انت ءُُ اے ازم ءِ درشانی کرت انت کہ ملک ءِ درستیں بہر آں سرجم امن ءِ بحالی ءِ ھاتر ءَ نیشنل ایکشن پلان ءِ سرا کار برجاہ مانیت۔
صدر مملکت ءُُ مزن وزیر ءَ پاک چین اقتصادی راہداری ءِ جوڑ ءُُ جاڑی ءِ رفتارءِ سرا تسلاءِ درشانی کنگءَ گشتگ کہ اے منصوبہ نہ الما پاکستان بلکں درستیں خطہ ءِ ھاترءَ پائدگی ثابت بیت۔ دوئیں راھشون آں اے ازم ءِ درشانی کرت انت کہ پاک چین اقتصادی راہداری ءِ شریں منصوبہ ءَ درسیں صوبہ ءُُ خطہ ءَ بروبر پائدگ بہ رسیت۔ دوئیں راھشون آں پاکستان ءَ ھستیں مسئلہ ءِ سرا دست گرگ ءُُ دیمروی ءُُ وشحالی ءِ شاہرگ ءِ سرا روان دارگ ءِ ھاترءَ تپاک ءُُ یکجہتی ءِ سرا زور دات انت۔ اے موہ ءَ خطہ ءِ جاورالءِ ہم چار ءُُ تپاس گپت انت ءُُ دوئیں راھشون آں خطہ ءَ امن ءُُ وشحالی ءِ ھاتر ءَ درستیں ہمساہگ ملک آں گوں دوستانہ سیادی ءِ واہشت ءِ درشانی ہم کرت انت۔
