اسلام آباد(پاکستان پوائنٹ نیوز۔ یکم اگست۔2016ء) وزیر داخلہ چوہدری نثارعلی خان پارینے کہ جعلی شناختی کارڈز و پاسپورٹس آک قومی سلامتی کن خلیس ءُ، اوفتے ہر دروشم اٹی چٹفنگک۔ اسہ توآن ہم کم وخت اٹی دامہم نا بے کچ است بڈ نتیجہ مون آ بسنے و شاری تا کنڈآن 26لکھ کلہوآک نادراءِ دوئی مسنو وخت اس کہ 18لکھ کلہو آتے نادرا راہی کرینے، 37ہزار خلقت آک ہیلپ لین آ کال کریر، داوخت اسکان 23ہزار غیر تعلقدار بندغ آتا پیدواری مسنے، بروک آ تو آن جعلی شناختی کارڈز جوڑ کرفوک آتا برخلاف مقدمہ غاتا اندراج نا بناء مریک ہرانا سزا 14سال قید ءِ ، ستمبر آن جعلی شناختی کارڈز تخوک آتا دزگیری تا بناء مریک ، کراچی آپریشن ءِ منطقی انجام اسکان سرکننگک ، سیاسی بیک گراؤنڈ والا دزگیری مریک تو آپریشن نا کسر اٹی اڑاند سلفک، سندھ انا تہہ ٹی رینجرز154آپریشن کریر ہرافتے ٹی 533 بندغ ءِ دزگیر کننگا، نیشنل ایکشن پلان نا 20آن 15ٹک آتیا پیش رفت تسلی بشخ ءِ، بھارتی وزیر داخلہ تون اوڑدہی کن بے تاب افٹ۔
دوشنبے آ داڑے پنجاب ہاؤس اٹی پریس کانفرنس آن تران کرسا اوپارے کہ کراچی آپریشن نا بابت رینجرزنا واک ، شناختی کارڈ زانا تصدیق نا مہم و نیشنل ایکشن پلان نا بابت مروک آ دیوان نا بارواٹی ہیت کننگ کن پریس کانفرنس اڈتننگ انگ ءِ۔ اوپارے کہ نیشنل ایکشن پلان نا بابت بروک آ ہفتہ نا اول اٹی اسہ دیوان اسے بٹنگ انگک ہراٹی آرمی چیف و انٹیلی جنس ادارہ غاتا سروک آتے خوائفنگک و داوخت اسکان نا پیش رفت و پین وخت اکن مون آ ہِننگ نا بابت غور کننگک۔
وزیر داخلہ پارے کہ شناختی کارڈ زانا تصدیق کن 6تو انا وخت تننگاسس اولیکو تو چٹانے۔ تدوک آ تو ہراتم دا عمل نا بنا کننگا تو اگرچہ میڈیا و جاچکار آتا گیشتری دادے مثبت انداز اٹی خنار ولے گڑاس خلقت آک داایکسر سائز اٹی جوجک کشنگ ءِ تینا زمہ ہلکونو ، اِرا اخبار داڑآ اداریہ نوشتہ کرسا تنقید کریر ، اسہ قابل احترام اخبار اس تو اسہ اداریہ غان گڈ پین ہیت کتو ولے ایلو داوخت اسکان مسہ اداریہ نوشتہ کرینے ہالانکہ دا اداریہ غاتیٹی ہرا حساب وکتاب پیش کننگانے اوہم غلط ءِ۔
اوپارے کہ گڑاس اخبارک دامعاملہ غا ننا راہشونی ءِ کریر، ای اوفتے آن بیدس ناقدین تاہم منت وار اُٹ و اوفتا تنقید ءِ بخیرٹ پاوہ ولے دا سیاسی ءُ ویل اس اف بلکن دا ملکی سلامتی آن بابت معاملہ اسے، جعلی شناختی کارڈز آتا ویل ننا دورانا ودکی کروک اُس اف بلکن دا جعلی شناختی کارڈز آک ننے آن مست انا دوراٹی جوڑ مسر۔ اوجعلی شناختی کارڈزآتا مہم اٹی میڈیا نا کڑد انا منت واری ءِ ادا کرے و پارے کہ میڈیا تینا ان پٹ نا کمک اٹ دامہم نا مومینٹم ءِ برقرار تخا۔
اومیڈیا آن خواست کرے کہ او دا مومینٹم ءِ مون آ ہم برقرار تخر۔ اوپارے کہ ملک انا داکنڈ و اے کنڈ انا الس دامہم اٹی پبی بشخ ہلکر۔ اولیکو 15دے تو ڈیٹا ہی میسر ہلوکہ۔ ای تینٹ پی ٹی اے آن او ڈیٹا ءِ میسر کرفیٹ و ہنداوڑ 15دے اٹی ہرا کاریم مسنے اوٹی نادرا ءِ الس نا کنڈآن 26لکھ ایس ایم ایس موصول مس ہرافتا کمک اٹ شاریک تینا شناختی کارڈ ز و فیملی ٹری نا تصدیق کن کلہو آتے راہی کرے۔
اوکان بیدس نادرا ہم 18لکھ کلہو آتے راہی کرے و داغٹ ایکسر سائز آتا نتیجہ ٹی ہراشناختی کارڈز آتیا فوکس مس اوفتا کچ 2کروڑ 24لکھ ءِ۔ ہنداوڑ گویا اولیکو تو اٹی کل شناختی کارڈز آتا 1/5 بشخ کورمس۔ اوپارے کہ ہیلپ لین آ 37ہزار کال کننگا و داوخت اسکان 23ہزار غیر تعلقدار خلقت آتا پیدواری مسنے۔ داپیدواری ءِ خلقت آک تینٹ کرینو۔ وزیر داخلہ پارے کہ بروک آ توآن جعلی شناختی کارڈز انا پیدواری کروک آتے 10ہزار روپئی انعام تننگ نا چرجوئی نا ہم بناءِ کننگک تانکہ دامہم اٹی پین ترندی بریک۔
اوپارے کہ جعلی شناختی کارڈز آتے ہلنگ کن نادرا اسہ پین مشق اس ہم کننگ ءِ ، اوڑآن بیدس انٹیلی جنس ایجنسی تا کمک اٹ ہم جعلی شناختی کارڈز آتے ہلنگ نا کاریم جاری ءِ ، 2011 ء آن مست دابابت آن ہچ ءُ فریم ورک اس ساڑی ہلو، 2011 ء ٹی صرف 26، 2012ء ٹی 493شناختی کارڈز بلاک مس وخت اس کہ ننا حکومت اڈ ہلنگ آن گڈ دابابت آن ترندی بس و 2015ء ٹی 96ہزار آن زیات و داسال داوخت اسکان اسہ لکھ 11ہزار آن زیات جعلی شناختی کارڈز بلاک کننگانے۔
اوپارے کہ جعلی پاسپورٹ و شناختی کارڈز قومی سلامتی کن خلیس ءِ اودے ہر دروشم اٹی چٹفنگک۔ اوپارے کہ نن دابابت آن ایس او پی تیار کرے و جتا ایئر لائنز آتے 3کروڑ 95لکھ جرمانہ کرے ہراٹی 2کروڑ 10لکھ روپئی ریکور کننگانے۔ اسہ اسہ روپئی ءِ ریکور کننگک۔ داسانہ ایئر لائنز آن بیدس دستاویزات آتا پاکستانی تے ہتیک و نہ ہی گدریفنگک۔ اوپارے کہ یورا ایگریمنٹ آ گڑتی تا درشانی ءِ کریر تو حکومت نا تہہ آن گڑتیک مون آ بسر ولے داسا یورپی یونین تون اوار غٹ آک صفت آتے کرسا دم درینگپسہ۔
اوپارے کہ وزیراعظم نا کماشی ٹی دیوان اٹی رینجرز نا واک آتا بابت آن ہیت مسنے ولے چونکہ میڈیا رپورٹس آتا رداٹ دابابت پیش رفت مسنے ہنداخاطران ای دابابت آن زیات ہیت کننگ خواپرہ۔ اومیت ءِ کہ پوسکنا وزیراعلیٰ دابابت پیش رفت کینہ۔ اوپارے کہ اسہ عجیب حالیت اس ئس کہ سول آرمڈ فورسز آک کراچی ٹی لیگل کور آن بیدس ساڑی ئس، اِرا فوجی ورناءِ دے پاک اٹی شہید کننگا و داوخت اسکان پیدواری مننگ کتو اونا پد اٹ دیر ءِ، لاڑکانہ ٹی رینجرز آتا ورناتا شہیدی ہم بے کچ سنجیدہ معاملہ اسے ولے سول آرمڈ فورسز آک داوخت کانودی وڑاٹ رسپانڈ کننگ نا پوزیشن اٹی افس۔
اوپارے کہ کراچی آپریشن اٹی داوخت اسکان 31افسر و ورنا شہید و 89ٹھپی مسنو۔ وزیر داخلہ پارے کہ نیشنل ایکشن پلان نا 20ٹک آتیان 15غا پیش رفت است جم، 4آ بھاز سست و اسٹ آ نہ است جم و نہ ہی سست ءِ، رینجرزآک صرف کراچی ٹی افس بلکن مچ آ سندھ اٹی ءُ ، داوخت اسکان سندھ انا تہہ ٹی 154آپریشن مسنے ہرافتے ٹی 533بندغ ءِ دزگیر کننگانے۔ اوفتے ٹی 34کالعدم تنظیم، 24منشیات آن بابت، 10ہائی پروفائل سمگلرز و 16جتائی پسند رڑآتا برخلاف و 127غیر کانودی ایلینز نا بابت آن ءُ۔
اسہ پین سوج اسینا ورندی ٹی اوپارے کہ اوغان پناہ گزین آتا بابت وزارت داخلہ و سیفران نا وزارت نا موقف اٹی پرخ ءِ ، ہراپناہ گزین آک ہِننگ کیرہ اوفتے ہنوئی مرے ولے ننے اوغان پناہ گزین آتے دوئی آسراتی تا غلط کاریم اٹ ہتنگ ءِ توروئی ءِ۔ بھارتی وزیر داخلہ تون اوڑدہی نا بابت آن سوج انا ورندی ٹی اوپارے کہ کنے بھارتی وزیر داخلہ آن سارک دیوان نا وخت آ جتا ملنگ نا ہچ ءُ شونک اس اف نہ ای اوڑکن بے تاب اُٹ۔