اسلام آباد(پاکستان پوائنٹ نیوز۔ یکم اگست۔2016ء) وزیراعظم محمد نواز شریف صدر مملکت ممنون حسین تون دوشنبے آ ایوان صدر اٹی اوڑدہی کرے۔ اوڑدہی ٹی ہڑتوم آ راہشونک ملک انا عمومی حالیت و اہم قومی معاملہ غاتیا ہیت و گپ کریر۔ صدر مملکت ممنون حسین وزیراعظم ءِ جان جوڑی آ اسہ وار ولدا مبارکبادی تس و دا اومیت نا درشانی ءِ کرے کہ وزیراعظم نواز شریف کل توانائی تون ملک و قوم انا خذمت ءِ کرسا کیک۔
اوڑدہی ٹی پاک چین اقتصادی راہداری ڈٹ انا رداٹ توانائی نا برجاء ڈٹ، امن و ایمنی نا حالیت، آپریشن ضرب عضب و قومی معیشت نا احیا نا معاملہ غاتیا درشانِ خیال کننگا۔ وزیراعظم داوخت آ صدر مملکت ءِ جتا معاملہ غاتیٹی حکومت نا پالیسی و فیصلہ غاتیان ہم معلومدار کرے۔ صدر مملکت پارے کہ وزیراعظم و اونا اقتصادی ٹیم تینا سوگو حکمت عملی نا رداٹ قومی معیشت نا گچینی کن قابل قدر کڑد ادا کننگ ءِ ہرانا بین الاقوامی کہول آہم ستاءِ کننگانے۔
ہڑتوم آ راہشونک خواست کریر کہ ملک اٹی سوگوی و شون اکن دا شونداری ڈٹ آتا پوروی ٹی حکومت تون کمک کننگے۔ ہڑتوم آ راہشونک پاریر کہ حکومت شونداری ایجنڈہ آن تینا توجوہ ءِ اسہ پلوکپک و ملک انا شون و الس نا زند انا آب اٹی گچینی کن شونداری ڈٹ آتے پورو کننگ کن تندہی اٹ کاریم کرسا کیک۔ اوپارے کہ حکومت شونداری عمل نا وخت آ قومی سرمایہ نا درست و شفاف کاریم اٹ ہتنگ ءِ ہر دروشم اٹی باوری جوڑ کیک و بدعنوانی ءِ ہچ ءُ کہول اسیا سگنگ پننگک۔
صدر مملکت و وزیراعظم آپریشن ضرب عضب نا وخت آ دوئی مروک آ سرسہبی تیا است جمی نا درشانی ءِ کرسا پاریر کہ ملک اٹی آخریکو دہشت گردنا چٹفنگ اسکان دا آپریشن برجاء سلک۔ ہڑتوم آ راہشونک دہشت گردی و انتہاپسندی تون مون تننگ کن سلہہ بند فوج و کانود نافذ کروک آ ادارہ غاتا افسر و ورناتا قربانی تے خراج تحسین پیش کریر و داعزم انا درشانی ءِ کریر کہ ملک انا غٹ بشخ آتیٹی پورو امن نا بحالی کن نیشنل ایکشن پلان آ عمل برجاسلک۔
صدر وزیراعظم پاک چین اقتصادی راہداری نا جوڑ جاڑ نا رفتارآ است جمی نا درشانی ءِ کرسا پاریرکہ داڈٹ نہ صرف پاکستان بلکن مچ آ ڈیہہ کن مفید ثابت مریک۔ ہڑتوم آ راہشونک داعزم انا درشانی ءِ کریر کہ پاک چین اقتصادی راہداری نا عظیم الشان ڈٹ آن غٹ صوبہ و ڈیہہ تے اسہ وڑفائدہ دوئی مریک۔ ہڑتوم آ راہشونک پاکستان ءِ مون تروک ویل آتا مون ءِ توننگ و شون و شونہالی نا کسر آ روان کننگ کن اتحاد و سخا آ زورشاغار۔ داوخت آ ڈیہہ نا حالیت آتا ہم جاچ ءِ ہلنگا و ہڑتوم آ راہشونک ڈیہہ ٹی امن و شونہالی کن غٹ پڑوسی ملک آتون دوستانہ تعلقداری تا خواہش نا درشانی ءِ ہم کریر۔
