حڪومت ملڪ مان منشيات جي خاتمي لاءِ موثر حڪمت عملي تي عمل ڪري رهي آهي: وفاقي وزير صلاح الدين ترمذي

اسلام آباد (پاکستان نیوزپوائنٹ20نومبر2017ء) منشيات جي خاتمي واري وفاقي وزير ليفٽيننٽ جنرل (ر) صلاح الدين ترمذي چيو آهي ته حڪومت ملڪ مان منشيات جي خاتمي لاءِ موثر حڪمت عملي تي عمل ڪري رهي آهي، اسڪولن ۽ ڪاليجن ۾ وبا پکڙجي رهي آهي، نئين ڊرگ پاليسي هن ئي مهيني تيار ٿي ويندي. ڪالهه سومر ڏينهن سينيٽ ۾ سينيٽر طاهر حسين مشهدي جي رٿ تي بحث سهيڙيندي هن چيو ته 2011ع کان ملڪ افيون کان پاڪ ٿي چڪو آهي ۽ جيڪڏهن ڪٿي ان جي پوکيءَ ٿئي به ٿي ته ان کي تباهه ڪيو ويندو آهي. هن وقت افغانستان افيون جي پوکيءَ جو وڏو مرڪز آهي ۽ اتي هيروئن ٺاهڻ جون فيڪٽريون لڳل آهن. هن چيو ته اينٽي نارڪوٽڪس فورس 1993ع ۾ قائم ڪئي وئي هئي. 1994ع ۾ اسان جي پهرين ڊرگ پاليسي ٺهي. هاڻي اسان نئين ڊرگ پاليسي تي ڪم ڪري رهيا آهيون ۽ اها هن ئي مهيني تيار ٿي ويندي. هن چيو ته اينٽي نارڪوٽڪس فورس جا رڳو 3 هزار اهلڪار ۽ اسان جون 28 پوليس اسٽيشنون آهن. 1996ع کان هيستائين 6 ارب 89 ڪروڙ رپين کان وڌيڪ جي منشيات پڪڙي وئي آهي. بدقسمتي سان اسڪولن ۽ ڪاليجن ۾ اها وبا پکڙجي رهي آهي پر استادن ۽ شاگردن ۾ شعور اجاگر ڪرڻ ۽ منشيات جي روڪٿام جي لاءِ موثر قدم کنيا پيا وڃن.