ايبٽ آباد ڪميشن جي رپورٽ عام ڪرڻ جي فيصلي کان اڳ ان جو جائزو وٺندس: وزيراعظم محمد نواز شريف

سراجيوو (بوسنيا) (پاکستان نیوز پوائنٹ 22دسمبر2016ء) وزيراعظم محمد نواز شريف چيو آهي ته هو ايبٽ آباد ڪميشن جي رپورٽ کي عام ڪرڻ جي فيصلي کان اڳ ان جو جائزو وٺندو. بوسنيا جي دوري تي ويندڙ صحافين سان ناشتي تي ڳالهائيندي وزيراعظم چيو ته ملڪ واپس اچڻ تي هو ان رپورٽ جو جائزو وٺندو. وزيراعظم هن وقت بوسنيا جي ٽن ڏينهن جي سرڪاري دوري تي آهي، جڏهن کانئس پاڪستان پيپلزپارٽي جي شريڪ چيئرمين آصف علي زرداري جي ملڪ واپس اچڻ جي حوالي سان پڇيو ويو ته هن چيو ته سچ پڇو ته مون کي سندس وطن واپسي جي خوشي آهي. کيس واپس اچي پنهنجي پارٽي جا معاملا ڏسڻ گهرجن. وزيراعظم چيو ته هو سياسي رابطن جي حق ۾ آهي ۽ هن پيپلزپارٽي سان ميثاق جمهوريت تي صحيحون پڻ ڪيون آهن. وزيراعظم چيو ته هن پاڪستان پيپلزپارٽي جي حڪومت جي دور ۾ ڪڏهن به حڪومتي نظام کي خراب ڪرڻ جي ڪوشش نه ڪئي. پيپلزپارٽي سان اختلافن جي باوجود سندس پارٽي ڌرڻن ۽ احتجاج جي پاليسي اختيار نه ڪئي. هن چيو ته 2016ع سندس حڪومت جي لاءِ هڪ مشڪل سال هو تنهن هوندي به اهو بهتر انداز ۾ مڪمل ٿيڻ وڃي رهيو آهي. ملڪ جا معاملا هلائڻ هر هڪ جي ذميواري نه آهي ۽ خاص طور تي ڌرڻن جي عادت کان مجبور ماڻهن جو اهو ڪم نه آهي. پرويز مشرف جي نالي وٺڻ کانسواءِ وزيراعظم چيو ته 7 نقاطي ايجنڊي ڪا مثبت تبديلي نه آندي ۽ هو قوم کي بجلي جي لوڊشيڊنگ جي عذاب ۾ مبتلا ڪري ڇڏي ويو. وزيراعظم ان تاثر کي رد ڪيو ته سندس حڪومت توانائي جو بحران ان جي لاءِ ختم ڪرڻ چاهي ٿي ته هو ايندڙ عام چونڊون کٽي سگهن. اصل ۾ سندس حڪومت سمورا مسئلا حل ڪرڻ چاهي ٿي ۽ حڪومت هر شعبي ۾ سڌارا آڻڻ جي پاليسي تي عمل پيرا آهي. نواز شريف چيو ته هو پنهنجي پارٽي منشور تي عمل پيرا ٿيڻ جي لاءِ ڪم ڪري رهيو آهي. هن چيو ته سڄي ملڪ ۾ 49 جديد اسپتالن جي تعمير جي منصوبن کي فعال انداز ۾ مڪمل ڪيو پيو وڃي جڏهن ته ڪيترن ئي ضلعن جي عوام کي هيلٿ ڪارڊ پڻ جاري ڪيا ويا آهن. وزيراعظم چيو ته ايل اين جي ۽ سولر پلانٽس جي منصوبن ۾ شفافيت کي يقيني بڻايو پيو وڃي. قومي ناڻي ۾ 100 ارب رپين جي بچت ڪئي وئي آهي. چار ريگيوليٽري اٿارٽين کي حڪومتي ڪنٽرول ۾ ڪرڻ جي حوالي سان هڪ سوال جي جواب ۾ هن چيو ته انهن ريگيوليٽري باڊين جو مقصد پرائيويٽ سيڪٽر کي ريگيوليٽ ڪرڻ هو پر انهن حڪومت کي ريگيوليٽ ڪرڻ شروع ڪري ڇڏيو، انهن ريگيوليٽري باڊيز جي ان طرزعمل سبب مختلف منصوبن ۾ دير ٿي جيڪا ڪنهن به صورت ۾ برداشت جوڳي نه آهي.