پجنگ(پاکستان پوائنٹ نیوز17۔جنوری2017ئء) چین دے سرکاری ٹی وی چینل اُتے چلن والا اک بیان سوشل میڈیا اُتے ڈاڈھا مشہور ہو گیا اے۔ تفصیل دے مطابق چین دے سرکاری ٹی وی اُتے اک بیان چلایا گیا جہدے وچ سرکاری ٹی وی نے دسیا کہ جے بھارت دی چین نال جنگ ہوئی تے چینی فوج موٹر بائیک اُتے 48گھنٹیاں دے اندر اندر بھارتی دارالحکومت نویں دِلی وچ وڑ سکدی اے جدکہ چین دی فضائیا نوں بھارتی دارالحکومت پہنچن وچ زیادا توں زیادا 10گھنٹے چاہیدے ہون گے۔
چین دے سرکاری ٹی وی چینل اُتے ایہ دعوا ہون دے بعد بھارت دے نال نال سوشل میڈیا اُتے وی بے چینی ویکھن وچ آئی اے۔ ایہ پہلی وار نہیں اے کہ چین نے کسے وی ملک نوں باز رکھن لئی بیان بازی دا سہارا لیا اے پر چین ولوں ایس طرحاں دا دعوا پہلی وار ساہمنے آیا اے جہدے وچ کسے ملک دا ناں ورتیا گیا ہووے۔ ایتھے دلچسپ گل ایہ اے کہ چین دے سرکاری ٹی وی اُتے ایہ دعوا بھارتی آرمی چیف بپن راوت ولوں پاکستان لئی کولڈ سٹارٹ سٹرٹیجی دے بیان مگروں چلایا گیا۔ ایس توںوکھ چینی ٹی وی چینل دے اک پروگرام وچ ایس دعوے دے نال نال چینی فوج دی آوا جاوی دی ویڈیو وی وکھائی گئی اے۔
