تن ورھے پہلے ملائشیا دے لاپتا ہون والے مسافر جہاز دی بھال دا کم روک دِتا گیا

بحر ہند وچ اک لکھ 20ہزار مربع کلو میٹر وچ جہاز دی بھال دے بعد ایہ فیصلا افسوس نال کیتا گیا اے،پر امید رکھدے آں کہ نویاں معلومات نال مستقبل وچ جہاز بارے پتا لگ سکدا اے: آسٹریلیا، ملائشیا تے چین دا سانجھا بیان

تن ورھے پہلے ملائشیا دے لاپتا ہون والے مسافر جہاز دی بھال دا کم روک دِتا گیا
 بحر ہند وچ اک لکھ 20ہزار مربع کلو میٹر وچ جہاز دی بھال دے بعد ایہ فیصلا افسوس نال کیتا گیا اے،پر امید رکھدے آں کہ نویاں معلومات نال مستقبل وچ جہاز بارے پتا لگ سکدا اے: آسٹریلیا، ملائشیا تے چین دا سانجھا بیان

سڈنی، کوالالمپور(پاکستان پوائنٹ نیوز17۔جنوری2017ء) تن ورھے پہلے ملائشیا دے لاپتا ہون والے مسافر جہاز دی بھال دا کم روک دِتا گیا، ایس مسافر جہاز وچ 239بندے سوار سن۔ غیر ملکی میڈیا دے مطابق آسٹریلیا، ملائیشیا تے چین ولوں جاری سانجھے بیان وچ آکھیا گیا اے کہ بحر ہند وچ اک لکھ 20ہزار مربع کلو میٹر وچ جہاز دی بھال دے بعد ایہ فیصلا افسوس نال کیتا گیا اے۔

پر اوہ امید رکھدے نیں کہ نویاں معلومات نال مستقبل وچ جہاز بارے پتا لگ سکدا اے۔ جہاز وچ سوار مسافراں دے رشتے داراں نے ایس فیصلے نوں غیر ذمے وارانا قرار دیندے ہوئے ایہدے اُتے نظرثانی کرن دا مطالبا کیتا اے ۔یاد رہوے کہ 2014وچ ملائشین ائر لائنز دا بوئنگ 777جہاز پجنگ توں کوالالمپور جاندے ہوئے لاپتا ہو گیا سی، اجے صرف ایہدے 20ٹکڑے ملے نیں جہناں دی شناخت لاپتا جہاز دے ملبے دے طور اُتے کیتی گئی اے یاں صرف اندازا اے کہ اوہ جہاز دا حصہ ہو سکدے نیں۔

نومبر 2016وچ اک رپورٹ وچ آکھیا گیا اے کہ جہاز ممکنا طور اُتے تیز ہوا پاروں چھیتی ای بحر ہند وچ ڈِگ گیا۔ منگل نوں جاری ہون والے سانجھے بیان وچ آکھیا گیا اے کہ سانجھے سائنٹیفک جائزیاں راہیں ہور ممکنا علاقیاں وچ بھال دا کم کیتا گیا، اج تک جہاز دے مخصوص تھاں اُتے ڈِگن بارے کوئی نویاں معلومات ساہمنے نہیں آئیاں۔ بیان وچ ہور آکھیا گیا اے کہ اسیں پر امید آںکہ نویاں معلومات ساہمنے آﺅندےاں رہن گیاں تے مستقبل وچ کسے موقعے اُتے جہاز نوں بھال لیا جائے گا۔

دوجے پاسے مسافراں دے رشتے داراں دے وائس 370نامی گروپ نے آکھیا اے کہ بھال دا کم ضرور جاری رہنا چاہیدا جدکہ اوہدا کِھلار ہور ودھانا چاہیدا۔ اوہناں دا کہنا اے کہ ایہ فضائی سہولت فراہم کرن والیاں دا فرض اے کہ اوہ فضائی سفر دے تحفظ لئی ایس طرحاں دیاں کوششاں جاری رکھن۔