سعودی وزارت لیبر دا فیصلا: قاضی نے پاکستانی ڈرائیور خلاف کفیل دی حمایت وچ فیصلا سُنا دِتا

سعودی وزارت لیبر دا فیصلا: قاضی نے پاکستانی ڈرائیور خلاف کفیل دی حمایت وچ فیصلا سُنا دِتا

لاہور(پاکستان پوائنٹ نیوز17۔جنوری2017ء) سعودی عرب دی وزارت لیبر اینڈ سوشل افیئرز نے اپنے مقامی کفیل دے حق وچ فیصلا دے کے پاکستانی ڈرائیور دے حقاں دے تحفظ دیاں دھجیاں اُڈا دِتیاں، جہدے اُتے پاکستانی محنت کشاں سنے ہور غیر ملکیاں وچ تشویش پائی جا رہی اے۔ تفصیل دے مطابق پچھلے دِنا سعودی عرب دی وزارت لیبر اینڈ سوشل افیئرز نے اپنے سعودی شہری کفیل دی حمایت وچ حق سچ دا گلا گھٹ کے ظلم نوں جِت دوا ئی۔

سعودی عرب دی لیموزین کمپنی وچ پچھلے 16ورھیاں توں ڈرائیور دے طور اُتے کم کرن والے پاکستانی محنت کش محمود احمد نے اپنی اُچیچی گل بات وچ دسیا کہ اوہ 16ورھیاں توں سعودی عرب دی لیموزین کمپنی وچ ڈرائیور دے طور اُتے کم کر رہیا سی پر اوہنوں نہیں پتا سی کہ کمپنی قوانین وچ اوہناں مہینا وار تنخاہ، میڈیکل سنے ہور حق وی نیں۔ کمپنی دا کفیل بڑی سیانپ نال اوہناں معصوم محنت کشاں توں چار یاں 5مہینیاں بعد مختلف لیٹرز اُتے انگوٹھا، یاں دستخط کروا لِتے، جہدے وچ درج ہوندا اے کہ میں اپنی مہینا وار تنخاہ تے ہور حق لے لئے نیں۔