دمشق(پاکستان پوائنٹ نیوز14۔جنوری2017ء) خانا جنگی دا ساہمنا کرن والے ملک شام وچ مبینہ کیمیکل حملیاں وچ صدر بشار الاسد تے اوہناں دے بھرا سنے اعلا حکومتی عہدیداراں نوں براہ راست ملوث قرار دِتا گیا اے۔ میڈیا رپورٹس دے مطابق عالمی تحقیقاتی رپورٹ وچ بشار الاسد تے اوہناں دے وڈے بھرا نوں شام وچ مبینہ طور اُتے 2014تے 2015وچ ہون والے کیمیکل حملیاں دا ذمے وار آکھیا گیا اے۔
عالمی ادارے ’آرگنائزیشن فار دی پراہبیشن آف کیمیکل ویپنز (او پی سی ڈبلیو) تے اقوام متحدا ولوں کیتیاں جان والیاں سانجھیاں تحقیقات توں پتا لگا اے کہ کیمیکل حملیاں دے ذمے وار بشار الاسد تے اوہناں دے وڈے بھرا ماہیر سنے ہور اعلا حکومتی عہدیدار نیں۔ خبر رساں ایجنسی نے دعوا کیتا کہ کیمیکل حملیاں بارے ہون والیاں سانجھیاں تحقیقات دیاں دستاویزات ’رائٹرز‘ نے ویکھیاں نیں، جہناں وچ حملیاں دا ذمے وار بشار الاسد نوں وی آکھیا گیا اے۔
ادارے نے عالمی تحقیقات دا حصہ رہن والے بندیاں نوں اپنا وسیلا بناندے ہوئے آکھیا کہ کلورین گیس یاں کیمیکل ہتھیاراں دی ورتوں دا فیصلا بشار الاسد، اوہناں دے بھرا تے حکومت دے اعلا عہدیدارں نے کیتا۔ رپورٹ وچ آکھیا گیا کہ تحقیقاتی رپورٹ دے حوالے نال بشار الاسد نال رابطا نہیں ہوسکیا پر شامی حکومت دے عہدیداراں نے منیا کہ حکومتی فوج ولوں کیمیکل ہتھیاراں دی ورتوں دے الزام سچے نیں۔ یاد رہوے کہ رپورٹ دے مطابق شام وچ کیمیکل حملیاں بارے سانجھیاں تحقیقات نوں اقوام متحدا دی سلامتی کونسل دی حمایت حاصل سی، تحقیقاتی ٹیم دی سرپرستی ورجینا گامبا نے کیتی جدکہ سانجھی ٹیم وچ غیر جانبدار ماہرتے تکنیکی لوک وی شامل سن۔
