نویں دِلی(پاکستان پوائنٹ نیوز12۔جنوری2017ء) ’ایما زون کینیڈا‘ ویب سائٹ اُتے موجود بھارتی جھنڈے دے انداز وچ بنے ہوئے ڈور میٹس دے اک اشتہار نے بھارت اندر نواں جھیڑا کھڑا کر دِتا، بھارتی وزیر خارجا سشما سوراج نے آن لائن ویچ وٹک دی ویب سائٹ نوں ڈاڈھی تنقید دا نشانا بناندے ہوئے آکھیا اے کہ ایمازون ایس اشتہار اُتے بغیر کسے شرط اُتے چھیتی معافی منگے۔
بھارتی میڈیا دے مطابق ایما زون کینیڈا ویب سائٹ اُتے موجود بھارتی جھنڈے دے انداز وچ بنے ہوئے ڈور میٹس دے اک اشتہار نے بھارت اندر نواں جھیڑا کھڑا کر دِتا اے۔ اک ٹوئٹر ورتیندڑ ولوں آن لائن ویچ وٹک دی مشہور ویب سائٹ اُتے موجود مشین دھون جدکہ گھر تے باہر ورتن لئی موجود ڈور میٹس اُتے بنے جھنڈیاں دی نشان کاری کیتی، جہدے بعد بھارتی وزیر خارجا سشما سوراج غصے وچ آ گئیاں۔
سشما سوراج نے غصے دا وکھالا سوشل میدیا اُتے وی کیتا۔ اپنے ٹوئٹر اکاﺅنٹ راہیں سشما سوراج نے آن لائن ویچ وٹک دی ویب سائٹ نوں ڈاڈھی تنقید دا نشانا بناندے ہوئے لکھیا کہ ایمازون ایس اشتہار اُتے بغیر کسے شرط اُتے چھیتی معافی منگے۔ بھارتی وزیر خارجا نے ایہ مطالبا وی کیتا کہ ایس توہین آمیز پراڈکٹ دا اشتہار ویب سائٹ توں ہٹایا جائے۔ نال ای اوہناں نے کینیڈا وچ تعینات بھارتی سفیر نوں مخاطب کر کے ایہ وی لکھیا کہ ایہ پراڈکٹ برداشت جوگ نہیں، معاملے اُتے ایما زون دے اعلا حکام نال رابطا کیتا جائے۔
ایس پیغام دے بعد وی سشما سوراج دا غصہ گھٹ نہ ہویا تے اوہناں نے ایما زون نوں دو ٹوک انداز وچ واضح کر دِتا کہ جے ڈور میٹس دے ایہ اشتہار نہ ہٹائے گئے تے آن والے ویلے وچ ایمازون حکام نوں ہور ویزے جاری نہیں کیتے جان گے جدکہ جاری شدا ویزیاں نوں وی معطل کر دِتا جائے گا۔ جہدے بعد ایہ ڈور میٹ دا اشتہار ویب سائٹ توں غائب ہو گیا۔
